«Ертістің» көшбасшысы: Жұмасқалиев бойымызға сенімділік ұялатуда

«Ертістің» вингері Жан-Морель Поэ ASnews.kz сайтына берген сұхбатында Нұрбол Жұмасқалиевтің бас бапкер қызметіне келуімен командада болған өзгерістер туралы айтты.

«Шынын айтсам, бапкердің мінезі өте сабырлы. Ол бойымызға сенімділік пен еркіндік ұялатады. Сондай-ақ, бізбен көп тілдеседі, бұл командаға серпін береді. Енді жеңіске жету үшін жұмысты жалғастыруымыз керек», – деді ивуарлық ойыншы.

Сонымен қатар, Поэ «Каспий» қақпасына соққан дубліне қатысты пікір білдірді:

«Екінші голды инстинкт пен сәттіліктің арқасында соқтым – мұны ашық мойындаймын. Доп маңдайшаға тигеннен кейін маған қарай секірді. Ал бірінші эпизодта Швырев көмектесті, маған тек алға ұмтылу ғана қалды», – деп толықтырды ол.

ҚПЛ-дың 11-турындағы матчта «Ертіс» «Каспиймен» тең түсті (2:2). Бұл ойын павлодарлықтар үшін «Тобылдың» экс-бапкері Нұрбол Жұмасқалиевтің жетекшілігімен өткен екінші кездесу болды.

Осы маусымда Жан-Морель Поэ алаңға тоғыз рет шығып, үш гол соқты. Бұған дейін қанаттағы шабуылшы украиналық «Кривбасс» және грекиялық «Ираклис» клубтарында өнер көрсеткен.