«Ойындағы қалыпты жағдай»: «Алтай» көшбасшысы командаластарының арасындағы келіспеушілік туралы айтты

«Алтай» қорғаушысы Самюэль Одеоибо ҚПЛ-дың оныншы турындағы «Қызылжарға» қарсы матчтан (2:1) кейін ASnews.kz тілшісіне берген сұхбатында ойынды қорытындылады.

«Жеңіске жету әрдайым жағымды, ал сол жеңіске тікелей үлес қосу – одан да керемет. Соңғы нәтижелеріміз – бапкерлер штабы мен команданың еңбегі: біз біртұтаспыз және финалдық ысқырық шалынғанша бір-біріміз үшін соңына дейін күресеміз. Әр турда осылай қайталанады», – деді нигериялық легионер.

Сонымен қатар, Одеоибо екі командаласының арасындағы текетірес туралы пікір білдірді:

«Коновалов пен Назымхановтың арасында ешқандай кек немесе реніш жоқ. Бұл, ең алдымен, клубтың мүддесін ойлайтын футболшылар үшін алаңда жиі болатын үйреншікті жағдай. Қазір бәріміз бұл сәтті ұмытып, алға қарай күлімдеп қадам басып жатырмыз», – деп толықтырды ол.

32 жастағы орталық қорғаушы Самюэль Одеоибо «Қызылжар» қақпасына гол соғып, «Алтайға» маусымдағы алғашқы жеңісін сыйлауға көмектесті. Қазіргі уақытта Вахид Масудовтың шәкірттері турнир кестесінде 13-орында тұр.

Матчтың 20-минутында қақпашы Иван Коновалов пен Абылайхан Назымханов өзара сөзге келіп қалған болатын. Ресейлік қақпашы командаласының қорғаныстағы ойынына көңілі толмайтынын білдірді.