«Каспий» бапкері – Умаев туралы: Ақтөбе үшін емес, Ақтау үшін айқасуы керек

«Каспий» бас бапкерінің міндетін атқарушы Ерлан Шойтымов ASnews.kz сайтына берген сұхбатында «Тобылға» қарсы матчтағы (1:2) ресейлік шабуылшы Идрис Умаевтың ойынына баға берді.

«Алғашқы турларда Умаевтың физикалық дайындығы толық болмаған еді, бірақ қазір бабына енді. Ол – гол соғатын мүмкіндікті пайдалана алатын ойыншы, «Тобылға» қарсы кездесуде де жаман ойнаған жоқ, үлкен көлемде жұмыс атқарды. Біз сенің «Ақтөбеден» немесе басқа жақтан келгеніңе қарамаймыз. «Каспий» футболшысы атандың ба – Ақтау үшін айқас», – деді Шойтымов.

Сонымен қатар, 46 жастағы маман клубтағы кадрлық мәселелер туралы да айтып өтті:

«Басында айтпай-ақ қояйын деп едім, бірақ қазір бес шақты ойыншымыз жарақат алып, емделіп жатыр. Осы себепті алаңға Амарал да, Франса да шыға алмады. Құдайға шүкір, Жомарт қатарға қосылды», – деп толықтырды ол.

«Ақтөбенің» экс-форварды Идрис Умаев ҚПЛ-дың жетінші турындағы «Тобылға» қарсы матчта гол соқты. Қазақстандық жартылай қорғаушы Жасұлан Жұмашев бұған дубльмен жауап қатты.

Ерлан Шойтымов Пиралы Әлиев қызметінен кеткеннен кейін «Каспийдің» тізгінін өз қолына алды. Бұған дейін қызылордалық бапкер «Жетісай» клубында жұмыс істеген.