Ромащенко – Жұмасқалиевтің кетуі туралы: оның «Тобылда» қалғанын қаладым

«Тобылдың» бас бапкері Мирослав Ромащенко ASnews.kz сайтына берген сұхбатында «Каспийді» жеңгеннен кейін (2:1) команданың дайындығы мен клубтағы өзгерістер туралы айтты.

Көбірек прессинг жасау керек

«Қазіргі заманғы футбол жоғары қарқын мен барынша күшті талап етеді. Біз қарсыластың айып алаңымызға еркін кіруіне жол бермеуіміз керек. Тіпті доп қарсыластың алаңында болса да, біз оны өз қақпамыздан он метр жерде тұрғандай сезінуіміз қажет.

Ойынның ұйымдастырылуына көңілім толады, бірақ әлі де жұмыс істейтін тұстар бар. Қалай болғанда да, жігіттерге алғыс айтамын – матчқа дайындалуға небәрі үш күн болды. Тырысқандарына рақмет, жарайсыңдар», – деді Ромащенко.

Алаңнан қуылған марокколық ойыншының қасиеттері туралы

«Мен бұл жағдайды киім ауыстыратын бөлмеде ғана білдім. Талалдың сары қағаз алғанын көрдім, содан кейін қақпашының алысқа бағыттаған добы мен финалдық ысқырық естілді. Дисквалификацияның себебін әлі де анықтауым керек.

Амин – өте ақылды футболшы. Өкінішке қарай, «Ахматта» жарақат алып қалғандықтан, біз қалағандай ұзақ жұмыс істей алмадық. Ол – плеймейкер әрі дирижер, бірақ бабына келу керек».

Жұмасқалиевтің қайта оралуын күтеді

«Бүгінгі жеңіс – Жұмасқалиев пен клубтан кеткен ассистенттердің еңбегі. Біз мұнда небәрі бірнеше күн ғана болдық, сондықтан оның командасын атап өтпеуге болмайды. Бұл мамандар «Тобылды» алға жетеледі. Жағдай осылай өрбігеніне өкінемін.

Жәрдемұлы өзіне деген құрметімді біледі, біз оны мазалаған мәселелерді үнемі талқылайтынбыз. Бұл өмір – кейде эмоция мен стресс болып тұрады. Мұндай адамдарды тек қалада ғана емес, бүкіл ел мойындауы керек. Бір күні Нұрбол қайтып оралады деп үміттенемін. Мен оның да, Даниярдың да (Мұқановтың) кеткенін қаламадым», – деп түйіндеді бапкер.

ҚПЛ-дың жетінші турындағы матчта қостанайлықтар Жаслан Жұмашевтің дублінің арқасында «Каспийді» жеңді.

Дебютант Амин Талал финалдық ысқырықтан кейін алаңнан қуылды. Бұған дейін марокколық футболшы молдовалық «Шериф» пен ресейлік «Ахматта» ойнаған.

Нұрбол Жұмасқалиев маусымның сәтсіз бастағандықтан өз еркімен отставкаға кетті. Оның жетекшілігімен «Тобыл» 57 ойынның 30-да жеңіске жетіп, Қазақстан Кубогы мен екі рет Суперкубокты иеленген болатын.