«Словактардың деңгейі жоғары»: «Ертістің» жаңа ойыншысы ҚПЛ-ды еуропалық чемпионатпен салыстырды

«Ертіс» жартылай қорғаушысы Юси Симамура ASnews.kz сайтына берген сұхбатында Словакия мен Қазақстан лигаларын салыстырып өтті.

«Словакияда мен кәсіпқой футболшы ретінде дебют жасап, біртіндеп өстім, сондықтан бұл ел мен үшін жай ғана сөз емес. Чемпионаттарды салыстыру қиын, өйткені жағдайлар мен инфрақұрылымдағы айырмашылық айтарлықтай. Бірақ словактардың деңгейі жоғары. Жергілікті футболшылар топ-лигаларға ауысып жатады.

ҚПЛ-дағы футбол тым дөрекі дегенге келсек, шынымды айтсам, Орталық Еуропада тартысқа одан да жиі түседі. Есесіне, осындағы ереже бұзуға бейімділіктің арқасында мен өткен ойында пенальти алып бердім», – деді павлодарлықтардың жаңа ойыншысы.

Айта кетейік, Юси Симамура словакиялық «Тврдошин» мен «Земплин» сапында бес жыл өнер көрсеткен. 26 жастағы жапондық елдің жоғары дивизионындағы 49 матчта екі нәтижелі пас берген. Бұған дейін ол аргентиналық «Ньюэллс Олд Бойз» сапында ойнаған.

Естеріңізге сала кетейік, Словакия чемпионатының бүкіл тарихында бар-жоғы үш қазақстандық өнер көрсеткен: қорғаушы Мидат Ғалбаев («Нитра»), вингер Ғалымжан Кенжебек («Кошице») және бүгінгі күнге дейін «Тренчин» намысын қорғап жүрген жартылай қорғаушы Шахмұрза Адырбеков.