«Астана» легионерінің агенті: Италиядан қызығушылық болды, бірақ Кажуколовас ҚПЛ-да бақытты

«Жальгиристің» экс-футболшысы және Кипрас Кажуколовастың өкілі Саулюс Миколюнас ASnews.kz сайтына берген сұхбатында «Астана» қорғаушысының алаңға қашан оралатынын айтып берді.

«Қазір Кажуколовас Дубайда мамандардың бақылауымен қарқынды жаттығу үстінде. Оңалтуға күніне 4-5 сағат жұмсайды: жүгіреді, денесін шынықтырады. Бір аптадан кейін ол Астанаға ұшып келуі керек, сол жерде қалпына келудің соңғы кезеңінен өтеді. Жазға қарай бабында болады деп күтіп отырмыз.

Кипрас – төзімді жігіт, сондықтан тізесіндегі мәселелерге бола мойымайды. Мұндай деңгейде осалдар жоқ. Ал дағдарыс аясында кету туралы ой да болған жоқ: «Астана» – үлкен клуб, ол өзін ол жақта жайлы сезінеді», – деді агент.

Сондай-ақ Миколюнас «Брайтонның» экс-қорғаушысы өткен жылы мансабын қайда жалғастыруы мүмкін болғанын да айтып берді:

«Ол Қазақстанға үйренісіп, бас бапкермен жақсы тіл табысып кетті. Әрине, 25 жаста тоқтамай өсе бергің келеді, бірақ әзірге Кипрасқа бәрі ұнап жүр. Жарақат алғанға дейін оған италиялық және швейцариялық командалар қызығушылық танытқан еді», – деп қосты ол.

Естеріңізге сала кетейік, литвалық Кипрас Кажуколовас осыдан сегіз ай бұрын тізенің крест тәрізді байламдарын үзіп алып, қатардан шығып қалған болатын. Елордалық клубтың сапында ол 58 матч өткізіп, үш гол соққан.

Айта кетейік, Саулюс Миколюнас – кезінде «Жальгирис», беларусьтік «Шахтер» және шотландиялық «Хартс» сапында өнер көрсеткен танымал футболшы. Жартылай қорғаушы Литва ұлттық құрамасының жейдесінде 101 ойын өткізген.