«Қайраттың» бұрынғы легионері: ҚПЛ-ға оралуым мүмкін

«Қайрат» пен Тринидад және Тобаго құрамасының экс-қорғаушысы Шелдон Бато ASnews.kz сайтына берген сұхбатында қазақстандық клубтар тарапынан қызығушылық бар екенін айтып берді.

«Бельгиядағы кезеңнен кейін отбасыма жақын болу үшін соңғы айларда өз отанымда ойнап жүрмін. «Дефенс Форспен» бірге КОНКАКАФ Чемпиондар Кубогында өнер көрсетіп, лиганы қатарынан екінші рет жеңіп алдық. Сонымен қатар ҚПЛ-ды да бақылап отырамын.

Клубтардың атауын айтпай-ақ қояйын, бірақ бірнеше жергілікті команда маған қызығушылық танытты. Маған Қазақстан ұнады, сондықтан бәсекеге қабілеттілігі төмендеу командаға көмектесу үшін болса да қайта оралу идеясы тартымды көрінеді», – деп мойындады Бато.

Естеріңізге сала кетейік, 35 жастағы орталық қорғаушы Шелдон Бато 2017 жылы «Крылья Советовтен» «Қайратқа» ауысып келген болатын. Алматылық клуб сапында 48 матч өткізіп, ел Кубогының екі дүркін иегері атанды.

Сондай-ақ Батоның еншісінде бельгиялық «Мехелен» мен «Васланд-Беверен» үшін өткізген 207 ойын бар. Футболшы «Брюгге» мен «Кортрейк» сияқты командалардың қақпасына гол соққан.

Қорғаушы қазіргі таңда Тринидад және Тобаго чемпионатында өнер көрсететін «Дефенс Форстың» намысын қорғап жүр. Батоның нарықтық бағасы 75 мың еуро деп белгіленген.