«Қайраттың» бұрынғы шабуылшысы: Сәтпаев «Астанаға» қарсы көшбасшылығын көрсетті

Қазақстан құрамасы мен «Қайраттың» экс-шабуылшысы Бауыржан Тұрысбек ASnews.kz сайтына берген сұхбатында төртінші турдың орталық матчындағы «Астанаға» қарсы (4:0) ойынды қорытындылады.

«Қайрат» «Астанаға» төрт гол соға алады деп ойламадым. Жабық ойында минималды басымдықпен жеңіске жетеді деп күткен едім. Әсіресе «1+1» нәтижесін жасаған Сәтпаев қуантты. Ол қазірдің өзінде көшбасшылық қасиеттерін байқатып жүр», – деді 34 жастағы футболшы.

Сондай-ақ Тұрысбек маусымға қатысты болжамымен де бөлісті:

«Чемпиондыққа дәл осы екі клуб үмітті: «Қайрат» пен «Астана». «Ақтөбе» маусым басында ұпай жоғалтып жатыр, «Тобыл» Суперкубоктен кейін құлдырап кетті, ал «Елім-ай» үшінші орынға таласа алады. Олар тұрақтылығымен ерекшеленеді», – деп қосты ол.

Естеріңізге сала кетейік, «Астанаға» қарсы матчта 17 жастағы шабуылшы Дастан Сәтпаевтан бөлек, Жоржиньо мен Александр Мартынович те голмен көзге түсті.

Тұрысбектің еншісінде премьер-лиганың 184 ойынында соққан 28 голы мен тоғыз нәтижелі пасы бар. Қазақстандық ойыншы «Тобыл», «Жетісу» және «Тараз» клубтарының сапында да өнер көрсеткен.