Өзбекстан құрамасының экс-сұрмергені: «Астананың» Абдурасуловты не үшін алғаны қызық

«Қайрат» пен Өзбекстан құрамасының бұрынғы шабуылшысы Жафар Ирисметов ASnews.kz сайтына берген сұхбатында Асилбек Абдурасулов пен Бектемір Абдуманноновтың ҚПЛ-дағы мүмкіндіктерін бағалады.

«Абдурасулов бала күнінен Жалолиддинов сияқты талант саналады, бірақ оның болашағы туралы сеніммен айту қиын, өйткені «Астана» – чемпиондықа үміткер команда. Дәл қазір көмектесе қоюы екіталай жас ойыншыны не үшін алғаны түсініксіз әрі қызық. Ол берілген мүмкіндікті пайдалануы керек. Ал Абдуманнонов – қалыптасқан футболшы. «Пахтакордағы» жұмысымнан оның ойынды өз мойнына ала алатын және дриблингтің арқасында алға өтетін сапалы ойыншы екенін білемін. Оның тәжірибесін ескерсек, «Оқжетпес» күшейе түскені анық», – деді 49 жастағы маман.

Естеріңізге сала кетейік, «Астана» «Газалкенттің» 18 жастағы вингері Асилбек Абдурасуловты жалға алғанын жариялады. Жастар деңгейінде Өзбекстан намысын қорғаған 23 жастағы Бектемір Абдуманнонов «Оқжетпес» сапын толықтырды.

2000-жылдардың ортасында Жафар Ирисметов «Қайрат», «Алма-Ата» және «Ақтөбе» сияқты клубтарда өнер көрсетті. Оның еншісінде премьер-лиганың 133 матчында соғылған 62 гол бар. Соңғы уақытқа дейін ол «Пахтакордың» спорттық директоры қызметін атқарды.