РПЛ-дың экс-легионері «Ақтөбе» бапкері жайында: Қырғызстанда Тарковичтің талаптарын орындай алмады

Мәскеулік «Динамо» мен Словакия құрамасының бұрынғы шабуылшысы Мартин Якубко ASnews.kz сайтына берген сұхбатында «Ақтөбенің» жаңа бапкері Штефан Тарковичтің қабілеттері туралы айтып берді.

«Таркович – Словакиядағы ең мықты және әлі де келешегі зор бапкерлердің бірі. Нақты жүйе мен тактиканы құра біледі, сондықтан ол «қалай сезсеңіздер, солай ойнаңыздар» дейтін мамандардың қатарынан емес. Ең бастысы, оның техникалық директор ретінде жұмыс істеген тәжірибесі бар. Алайда көп нәрсе футболшылардың мүмкіндіктеріне байланысты болатынын ескеру қажет. Қырғызстан құрамасы оның талаптарына жауап бере алмады – бұл оның кетуіне себеп болды. Мұны сенімді түрде айта аламын, өйткені Штефанмен жақын араласамын және өзім де жақында атқару комитетінен шықтым», – деді ардагер.

Естеріңізге сала кетейік, «ақ-қызылдардың» жаңа бапкері Штефан Таркович Қырғызстан құрамасын бір жыл бойы басқарған болатын. Команда 18 ойында тоғыз рет ұтылып, бар-жоғы бес рет жеңіске жетті.

Тарковичтің жетекшілігімен өткен алғашқы матчта «Ақтөбе» сырт алаңда «Ұлытаумен» 1:1 есебімен тең түсті.

Якубко РПЛ-да «Москва», «Динамо» және «Амкар» сияқты клубтардың сапында 151 матч өткізген. Оның еншісінде 23 гол және 12 нәтижелі пас бар.