«Крыльяның» экс-функционері: Адиевтің «Ақтөбемен» келіссөз жүргізуі ойыншыларға әсер етеді

«Крылья Советовтың» бұрынғы футболшысы әрі бас директорының орынбасары Зураб Циклаури ASnews.kz порталына берген сұхбатында Магомед Адиевтің қызметінен кетуі командаға қалай әсер етуі мүмкін екенін айтты.

«Бапкер басқа клубпен ашық түрде келіссөз жүргізгенде, бұл әрқашан футболшыларға әсер етеді. Олар жаңалықтарды оқиды, сондықтан психологиялық тұрғыдан зардап шегуі мүмкін. «Крыльядағы» құрам дәл сол маманға бейімделіп жасақталады: бапкердің өзі таңдаған ойыншылар ұзақ мерзімді келісімшарттарға отырады.

Енді бұл қызметке басқа адам келеді де, көптеген ойыншылар керексіз болып қалады. Ал келісімшартты бұзғаны үшін өтемақыны облыс қазынасынан төлеуге тура келеді. Біз мұны жылдан жылға көріп келеміз – бұлай болмауы тиіс», – деп атап өтті Циклаури.

Еске салайық, өткен аптада самаралық клубтың тәлімгері Магомед Адиев Астанаға ұшып келген болатын. Қазақстан құрамасының экс-бапкері «Ақтөбе» өкілдерімен келіссөздер жүргізген.

Дегенмен, қазіргі таңда ақтөбелік команданың тізгінін 53 жастағы словакиялық маман Штефан Тарковичтің ұстау ықтималдығы жоғарырақ болып тұр.

Еуро-2020 қаһарманы және Қырғызстандағы сәтсіздік: «Ақтөбені» жаттықтыруы мүмкін Таркович кім?