Жұмасқалиев – Мараттың негізгі құрамда шықпауы жайлы: ойынды күшейтеді деп есептедім

«Тобылдың» бас бапкері Нұрбол Жұмасқалиев Қазақстан премьер-лигасының үшінші турындағы «Астанаға» қарсы матчтан (0:2) кейін пікір білдірді, деп хабарлайды ASnews.kz.

Жұмасқалиев ойынға екінші таймда қосылып, шабуылды жандандырған Дамир Мараттың негізгі құрамда шықпау себебіне қатысты былай деді:

«Бұл – бапкерлік шешім. Дамирді екінші таймда шығарып, ойынды күшейтеді деп есептедім. Нәтижесінде дәл осы қапталда шабуыл үдей түсті. Жалпы, «Астана» алғашқы кезекте қарқынды, қысымға негізделген ойын өрнегін көрсетті», – деді Жұмасқалиев.

Еске салайық, Астанада өткен матчта алаң иелері сапынан Иван Башич (24-минут) пен Әлібек Қасым (66-минут) гол соғып, көзге түсті.

Осы жеңістен кейін жеті ұпай жинаған «Астана» турнирлік кестеде бірінші орынға көтерілді. Ал активінде бір ұпайы бар «Тобыл» 15-сатыға төмендеді.

Келесі турда, 4 сәуірде, «Тобыл» сырт алаңда семейлік «Елімаймен» кездессе, «Астана» Алматыда «Қайратпен» бақ сынасады.