«Ордабасының» бас бапкері – трансферлер туралы: тағы бір ойыншы алуды жоспарлап отырмыз

Шымкенттік «Ордабасының» бас бапкері Андрей Мартин «Жеңіске» қарсы ойыннан кейін (2:0) баспасөз мәслихатында легионерлердің бейімделуін бағалап, клубтың трансфер нарығындағы алдағы жоспарлары туралы айтып берді, деп хабарлайды ASnews.kz.

«Килама да, Аманович те – тәжірибелі ойыншылар. Біз оларды қорғанысымыздың сапасын арттыру үшін белгілі бір мақсатпен алдық. Оған қоса, Аманович бірнеше позицияда: қорғаныста да, тіреуіш аймақта да ойнай алады. Бұл жақсы трансферлер болды, жігіттер ұжымға тамаша әрі тез сіңісіп кетті, бұл командалық рухты жоғары деңгейде сақтау үшін өте маңызды.

Трансферлік терезе жабылғанша бізді одан әрі күшейте түсу үшін уақытты пайдалануды жоспарлап отырмыз. Басшылықтың құрамды күшейтуге қатысты нақты ниеті бар. Егер іске асып жатса – керемет болар еді.

Ал Сергей Малыйға келер болсақ, ол әрдайым өз деңгейінде ойнайды. Онда сәтсіз ойындар іс жүзінде жоқ. Ол ішкі біріншілік үшін өте тұрақты әрі сапалы футболшы, оның ұлттық құрамаға шақыртылуы да тегін емес. Ол командаға үнемі қажет нәрсені береді: артқы шептегі тұрақтылықты және қорғаныста да, шабуылда да әуедегі тартыстардағы жеңісті. Бұйырса, Сергейдің дені сау болып, командаға пайдасын тигізе берсін», – деді Мартин.

Еске салайық, ҚПЛ-2026 екінші турының матчы «Астана Арена» стадионында өтіп, шымкенттіктердің 2:0 есебі тіркелген жеңісімен аяқталды. Ойын тағдыры екінші таймда шешілді: алаңға тыңнан шыққан Жасұлан Әмір алдымен Сұлтанбек Астановқа нәтижелі пас берсе, кейін қарсыласынан допты тартып алып, өзі де гол соқты.

Айта кетейік, 26 жастағы камерундық орталық қорғаушы Ги-Марселин Килама мен македониялық қорғаушы Алекса Аманович «Ордабасы» сапында алғаш рет толық матч өткізді. Павлодарлық «Ертіске» қарсы (2:2) бірінші турда қос легионер де тек қосалқы құрамнан алаңға шыққан болатын. Екі ойынның қорытындысы бойынша «Ордабасының» еншісінде төрт ұпай бар, ал «Жеңіс» бір ұпаймен қалды.