А сериясында ойнаған қақпашы – Ботнарь жайлы: ҚПЛ-ға жақсы қақпашы келді

«Локомотив» клубы мен Ресей құрамасының бұрынғы қақпашысы Руслан Нигматуллин ASnews.kz сайтына берген сұхбатында Виталий Ботнарьдың «Ертіс» сапындағы дебютіне баға берді.

«Қазақстанға кетер алдында біз ақылдасқан едік. Бұл клубтың Премьер-лигада ойнайтынын білгенде, әрине, оның таңдауын қолдадым. Қызықты чемпионатта өзіңді неге сынап көрмеске? Ботнарь – жоғары деңгейлі қақпашы. Ол мұны дебюттік матчында нәтижелі пас беріп-ақ дәлелдеді және турдың символикалық құрамына да лайықты түрде енді.

Алғашқы ойынынан-ақ шеберлігін көрсете бастағанына қуаныштымын. Виталийге «Ертіс» құрамында тұрақтап, әрі қарай да әдемі сейвтерімен көзге түсуіне тілектеспін. Қазақстан Премьер-лигасы жақсы қақпашыға ие болды. Оның ойынына алаңдамаймын, өйткені ол менің қолғаптарыммен ойнап жүр (күледі)», – деді Нигматуллин.

Павлодарлық клуб 24 жастағы ресейлік қақпашы Виталий Ботнарьды «СКА-Хабаровск» клубынан жалға алды. Қазақстан Премьер-лигасында «Ордабасыға» қарсы алғашқы матчында Павел Седькоға нәтижелі пас беріп, кездесу 2:2 есебімен аяқталды.

Руслан Нигматуллин – кезінде «Локомотив» пен «Спартак» клубтарында ойнаған танымал футболшы. Ол 2002 жылғы әлем чемпионатына қатысқан. Сондай-ақ Италияда «Верона» және «Салернитана» клубтарының намысын қорғаған.