«Ақтөбенің» экс-сұрмергені – бапкерлік жұмысы туралы: бұрынғы клубымды жаттықтырғым келеді

«Ақтөбенің» экс-жартылай қорғаушысы Уго Видемон ASnews.kz сайтына берген сұхбатында 33 жасындағы бапкерлік қызметі туралы айтып берді.

– Корсика аралында жұмыс істеймін – «Газелек Аяччоның» U-17 командасын жаттықтырамын. Түсініктірек болу үшін айта кетейін, бұл Францияның жасөспірімдер чемпионатымен деңгейлес. Бағымызға орай, командамыз жақсы нәтижелер көрсетіп жүр, ал жазда біліктілігімді арттыруды жоспарлап отырмын. Сол кезде одан да жоғары деңгейде бапкерлік ете аламын.

– Өзің Марсельдің тумасысың ғой. Болашақта осы клубтың тізгінін ұстау туралы ойландың ба?

– Бар ойым – «Ақтөбеде».

Еске салайық, ұзақ уақыт жарақатымен қиналған француз үшін «Ақтөбе» ойыншы мансабындағы соңғы клуб болды. «Ақ-қызылдар» сапында шеткі жартылай қорғаушы 22 матч өткізіп, 10 гол соқты және үш нәтижелі пас берді.

Видемон «Газелек Аяччоға» 2024 жылы қосылды. Корсикалықтардың жасөспірімдер командасы чемпионат фавориттерінің үштігінен бес ұпай ғана қалып келеді.

Бұған дейін футболшы 39 жастағы португалиялық ойыншы Луиш Нанидің трансферіне қатысты әсерімен бөліскен болатын.