«Ақтөбенің» бұрынғы көшбасшысы – Нанидің трансфері жайлы: клуб бұдан пайда көреді

«Ақтөбенің» экс-жартылай қорғаушысы Уго Видемон ASnews.kz сайтына берген сұхбатында 39 жастағы Луиш Нанидің трансферіне қатысты әсерімен бөлісті.

«Нанидің «Ақтөбеге» ауысқанына қуаныштымын, өйткені бұл тек клубты ғана емес, бүкіл елді танытады. Жанкүйерлер бақытты болуы керек. Трансфер туралы хабарландыруды көргенде керемет әсер алдым.

Луиштің нағыз бабында екеніне сенімді емеспін, бірақ ол бұған дейін өзін топ-футболшы ретінде тамаша көрсете білген. Бір білерім: бәріміз оның ойынын асыға күтетін боламыз. Чемпионатқа осындай тұлға келген кезде, бұл әрқашан тиімді болады», – деді француз.

Еске салайық, қаңтар айында «ақ-қызылдар» «Манчестер Юнайтедтің» экс-вингері Луиш Нанимен бір жылдық келісімшартқа отырды. Клубтың хабарламасында айтылғандай, португалиялық ойыншы жобада «ерекше маңызды» рөл атқаратын болады.

Видемон «Ақтөбе» сапында 2022-2023 жылдары өнер көрсетті. Шеткі жартылай қорғаушы 22 матчта 10 гол соғып, 3 нәтижелі пас берді. Қазіргі уақытта француз «Газелек Аяччоның» жасөспірімдер командасын жаттықтырады.