«Покатилов өзін жақсы көрсетті»: «Сабах» бапкері ЧЛ матчының алдында қазақстандық ойыншының ойынын бағалады

Әзірбайжандық «Сабахтың» бас бапкері Вальдас Дамбраускас Чемпиондар лигасының плей-офф раундында израильдік «Хапоэльге» (Беэр-Шева) қарсы қарымта матч қарсаңында қазақстандық қақпашы әрі команда капитаны Стас Покатиловтың ойыны туралы пікір білдірді, деп хабарлайды ASnews.kz.

«Өткен ойында Покатилов өзін жақсы жағынан көрсетіп, төрт сейв жасады. Белгілі бір ойыншыларды бөліп-жарып айтқым келмейді. Мен барлық футболшыларыма бірдей сенемін. Біздің қолымыздан бәрі келетініне сенемін», – деді бапкер.

Чемпиондар лигасының плей-офф раундындағы «Сабах»—«Хапоэль» (Беэр-Шева) ойыны 25 тамызда Бакудегі Тофик Бахрамов атындағы Республикалық стадионда өтеді (басталуы – Қазақстан уақытымен сағат 21:45-те).

Алғашқы ойында израильдік клуб 2:1 есебімен жеңіске жеткен болатын.

«Сабах» капитаны ұзақ үзілістен кейін алғаш рет Қазақстан ұлттық құрамасына шақырту алды. Джон Ван’т Шкиптің командасы Ұлттар лигасында Фарер аралдары, Словакия және Молдовамен күш сынасады.