«Ұлттық құрама бапкері әсер етті»: «Бенфика» футболшысының неліктен «Қайратқа» ауыспағаны белгілі болды

«Бенфика» клубының жартылай қорғаушысы Томас Круздың неліктен «Қайратқа» ауыспағаны белгілі болды, деп хабарлайды ASnews.kz.

Ұлттық құрама бапкерінің әсері

«Оған Люксембург құрамасының бас бапкері хабарласып: «Егер «Қайратқа» ауыссаң, ұлттық құрамада ойнамайсың» деп айтқан және Португалияда қалуға кеңес берген. Мұндай футболшыларды Қазақстанға әкелу үшін тек көп ақша төлеп, көндіруге болады. Себебі біздің елдің рейтингі айтарлықтай жоғары емес. Оның үстіне, Круз ұлттық құрама деңгейіндегі ойыншы», – деді Рафаэль Уразбахтин «Левскимен» болған қарымта матчтан кейін.

Жаңа ойыншы іздестірудеміз

«Қарастырып жатқан ойыншылар бар. Бірақ кейбірімен келісе алмай, назарымызды басқа ойыншыларға аударудамыз. Әзірге шабуыл шебіне ойыншылардың жетіспей жатқаны анық байқалады. Чемпиондар лигасында тек жас ойыншыларға сенім арту өте қиын».

Шілде айының ортасында Томас Крузға «Қайрат» пен «Динамо Бухаресттің» талас жүргізіп жатқаны хабарланған еді. 21 жастағы футболшы Португалияда дүниеге келіп, «Порту» академиясында, кейіннен «Ганновер» жүйесінде тәлім алды. Ал қазір «Бенфиканың» екінші командасында өнер көрсетеді.

Жартылай қорғаушы 2024 жылдан бері Люксембург құрамасының намысын қорғап келеді. Transfermarkt порталы оның нарықтағы құнын 450 мың еуроға бағалап отыр.