Литвалық эксперт: Чебурин он жылда тіл үйренбей, қазір нағыз бишараға айналды

Литвалық комментатор әрі журналист Мантас Красницкас қазақстандық маман Владимир Чебуриннің «Жальгиристегі» жұмысы туралы пікірімен бөлісті.

«Чебурин маусымды нашар бастағандықтан қызметінен кетуі керек еді – ол кезде оған ешкім ештеңе демес еді. Ал енді кеш. Жақында «Судувамен» болған матчтан кейін ол баспасөз мәслихатына өзі бармай, көмекшісін жіберді, менің ойымша, Чебурин осы тұста әлсіздік танытты. Бұл масқара.

Ресей Украинаға шабуыл жасағанда мен Владимирден: «жанкүйерлердің трибунада Путинге қатысты айтқан сөздеріне қалай қарайсыз?» деп сұрадым. Ештеңе естімегенін, бар назары ойында болғанын айтты. Одан кейін де ештеңені байқамайтындай кейіп танытты, бірақ Литвада мұны байқамау мүмкін емес – сіз өз ойыңызды айтып, бір жақты таңдауыңыз керек.

Тағы бір мәселе – тіл. Кезінде Венсловаитене Чебуриннің мықты чемпионатқа кетуіне тек тілдің кедергі екенін айтқан еді, бірақ осы 10 жыл ішінде ол ағылшын тілін де, литва тілін де үйренуге тырыспады. Сені АПЛ-дан алшақтататын жалғыз нәрсе коммуникация мәселесі екенін ескерсек, бұл жиіркенішті дүние емес пе? (күлді). Арада 10 жыл өтті, бұл жаттықтырушы камераның сыртында да литва тілінде бір ауыз сөз айтпады! Жалпы, Чебуринді мұнда басында ғажайыптар жасаған кезде құрмет тұтатын, ал қазір нағыз бишараға айналды», – деді Красницкас BorodAbata.kz (AS News) тілшісіне берген сұхбатында.

Маусымның басында «ақ-жасылдар» Чемпиондар лигасының іріктеу кезеңінде мальталық «Хамруннан», ал Конференция лигасында солтүстік ирландиялық «Линфилдтен» жеңілген болатын. Бұл Чебуриннің Вильнюстегі бесінші жылы. 2014 жылдан бері қазақстандық маман Лиьвада «Круоя» мен «Судуваны» жаттықтырды.