Неймар мансабын қашан аяқтайтынын айтты

Бразилиялық «Сантос» клубының капитаны әрі жартылай қорғаушысы Неймар футболдағы мансабын аяқтау туралы ойымен бөлісіп, өзіне қатысты айтылған сынға жауап берді. Сондай-ақ болашақ жоспарларымен бөлісті. Бұл туралы ASnews.kz RMC Sport басылымына сілтеме жасап хабарлады.

34 жастағы футболшы өзінің физикалық жағдайы мен кәсіби мансабына қатысты ашық пікір білдірді.

«Кәсіби түрде тағы бес-алты жыл ойнай аламын ба? Жоқ», – деді бразилиялық.

Сондай-ақ ол жиі жарақат алатыны үшін өзін сынайтындарға да жауап қатты.

«Егер сенің тізең менікіндей болса, мені түсінер едің», – деді Неймар.

Бұдан бөлек, футболшы үлкен футболдан кеткеннен кейінгі жоспарымен де бөлісті.

«Мен Kings League турнирінде ойнағым келеді. Оған 2030 жылы қатысамын», – деді ол.

2026 жылғы Бразилия чемпионатында «Сантос» капитаны мүмкін болған 34 матчтың 15-не қатысып, сегіз гол соқты, үш нәтижелі пас берді.

Неймардың «Сантоспен» келісімшарты 2026 жылдың желтоқсан айында аяқталады. Transfermarkt порталы футболшының нарықтық құнын 8 миллион еуроға бағалап отыр.