Сәтпаевтың Англиядағы жарақаты: «Бернли» дайындығындағы осалдықты мойындады

Англиялық «Бернли» футбол клубының төрағасы Алан Пейс маусым басындағы жарақаттар эпидемиясына себеп болуы мүмкін команданың маусым алдындағы турнесіне қатысты жанкүйерлердің сынына жауап берді.

Саптан шыққан ойыншылар тізімінде Қазақстан құрамасының 18 жастағы шабуылшысы Дастан Сәтпаев та бар, деп хабарлайды ASnews.kz Burnley Express басылымына сілтеме жасап.

Осы жазда «Бкрнли» АҚШ-та коммерциялық турне өткізіп, онда үш жолдастық кездесу ойнады, содан кейін Еуропада тағы бірнеше спарринг өткізді. Алайда, жанкүйерлер мұхиттың арғы жағына жасалған бұл сапар футболшыларды Чемпионшиптің қатал жағдайларына физикалық тұрғыда тиісті деңгейде дайындауға мүмкіндік бермеді деп алаңдаушылық білдірді.

Журналист Мэтт Скрафтон атап өткендей, жанкүйерлердің қаупі расталды: жаңа бас бапкер Ники Хайеннің жетекшілігімен команда алғашқы сегіз турда нағыз жарақаттар эпидемиясына тап болды. «Айтарлықтай ауыр жарақат» алған ойыншылар қатарында қазақстандық Дастан Сәтпаев, сондай-ақ Башир Хамфрис, Ганнибал Межбри және Аарон Рэмзи бар.

Жақында жанкүйерлер кеңесімен өткен кездесу барысында клуб президенті Алан Пейс жағдайға түсініктеме берді:

«Біз команданың физикалық дайындығына қатысты алаңдаушылықпен келісеміз. Бұл мәселелерді футбол департаменті мұқият талдайтын болады. Шетелдік турнелердің коммерциялық пайдасын мойындай отырып, біз соңғы маусым алдындағы бағдарламаның кейбір аспектілерін қайта қарау қажет екенін түсінеміз», – деді Пейс.

Еске сала кетейік, лондондық «Челси» Дастан Сәтпаевтың құқығын 4 миллион еуроға сатып алып, оны «Бернлиге» жалға бергеннен кейін ол Англияға ауысқан болатын. Дәл осы жарақаттың кесірінен жас қазақстандық шабуылшыны Джон ван ’т Схип Ұлттар лигасы аясындағы Фарер аралдары мен Словакияға қарсы қыркүйек және қазан айларындағы матчтарға ұлттық құрамаға шақырмады.