«Бернли» тағы да жеңбеді: Сәтпаевтың клубы 93-минутта үш ұпайдан айырылып қалды

Ағылшын Чемпионшипінің сегізінші турында «Бернли» өз алаңында «Дерби Каунтимен» тең түсті (1:1), деп хабарлайды ASnews.kz.

Ойындағы есепті 34-минутта алаң қожайындары ашты: Лукас Пирестің пасынан кейін Зеки Амдуни мергендігімен көзге түсті. «Бернли» минималды басымдықты матчтың соңына дейін ұстап тұрды, алайда 93-минутта Мохаммед Фусейнидің дәл соққысының арқасында қонақтар жеңілістен аман қалды.

Бұл тең ойын «бордо түстілер» үшін биылғы маусымдағы төртіншісі болды. Алғашқы сегіз турда Никки Хайеннің командасы төрт рет тең түсіп, төрт рет жеңіліске ұшырады, осылайша әлі бірде-бір жеңіске жеткен жоқ. Бес ұпай жинаған «Бернли» турнир кестесінде 22-орынға табан тіреді. Ал «Дерби Каунти» төрт ұпаймен ең соңғы орында тұр.

Қазақстан ұлттық құрамасының шабуылшысы Дастан Сәтпаев «Мидлсброға» (1:1) қарсы матчтан кейін алған жарақатына байланысты бұл ойынның өтініміне енбей қалды. Биылғы маусымда 18 жастағы форвард Чемпионшипте үш кездесу, ал ағылшын лигасының Кубогында бір ойын өткізді.

Еске сала кетейік, «Бернли» Чемпионшиптегі келесі матчын 10 қазан күні сырт алаңда «Уотфордқа» қарсы өткізеді. Кездесу Қазақстан уақытымен 19:00-де басталады.