Юккола – «Аталантамен» тең ойын туралы: бұл нәтижеге лайықпыз

Алматылық «Қайраттың» жартылай қорғаушысы Ойва Юккола ASnews.kz сайтына берген сұхбатында Конференция лигасы жалпы кезеңінің үшінші туры аясында италиялық «Аталантаға» қарсы өткен сырт алаңдағы кездесуді (1:1) қорытындылады.

– Бұл матчтан кейін қандай сезімдесіз?

– Бір жағынан көңіліміз толады, өйткені ұзақ уақыт бойы есепте алда тұрдық. Соңында гол жіберіп алғанымыз өкінішті, әрине. Бірақ ойын басталмай тұрып бізге тең нәтиже ұсынса, ойланбастан келісер едім. Жалпы, өз тарапымыздан сауатты әрі сапалы ойын көрсете алдық.

– Бүгінгі нәтижеге қол жеткізудегі басты фактор не болды? Тактика ма?

– Иә, біз ойынға өте дұрыс дайындалдық. Бапкерлік штаб бізге жақсы идеялар мен жоспар ұсынды. Қарсыластың мықты екенін және сырт алаңда қорғаныста көп еңбек ету керектігін жақсы түсіндік. Алаңда бар күшімізді салдық және бұл міндетті жақсы орындадық. Сондықтан бұл бір ұпайға толықтай лайық болдық.

– «Аталантаның» деңгейін және стадиондағы атмосфераны қалай бағалайсыз?

– Атмосфера өте керемет болды, стадион да тамаша – тым үлкен де, тым кіші де емес. Қарсыластың деңгейін білдік, соңғы 2–3 жылда Еуропа лигасында табысты өнер көрсетіп, өз деңгейлерін дәлелдеген ұжым. Құрамдарында ойыншылар жиі ауысқанымен, бұл – футболдағы қалыпты жағдай. Олар қалыптасқан мықты команда, бірақ біз де лайықты ойын көрсете алдық.

– Қорғаныстың және алты рет сейв жасаған қақпашы Темірлан Анарбековтың ойыны туралы не айтасыз?

– Темірлан – фантастикалық қақпашы. Мұндай деңгейдегі ойындарда ұпай алу үшін дәл осындай мықты қақпашы керек. Бүгін тек қорғаныс шебі емес, жартылай қорғаушылар мен шабуылшылар да өте үлкен жұмыс атқарды. Барлығымыз бірге жақсы өнер көрсеттік.

– Бұл нәтиже Конференция лигасындағы алдағы матчтар алдында сенімділік бере ме?

– Әрине. Алда өз алаңымызда екі маңызды матч бар. Олар «Аталантаның» деңгейінде болмауы мүмкін, бірақ бұл турнирдегі кез келген қарсылас – өте мықты. Енді келесі кездесулерге дейін сәл демалып, дайындалуға уақытымыз бар. Жақсы ойын көрсетіп, маңызды ұпай еншіледік, осы қарқынды ары қарай жалғастыра аламыз.

Айта кетейік, Конференция лигасы 2026/27 маусымының жалпы кезеңіндегі үшінші тур аясындағы «Аталанта»—«Қайрат» матчы 5 қарашада Бергамода өтіп, 1:1 есебімен аяқталды. Алматылықтар сапында 53-минутта Марк Гуаль мергендік танытса, бергамаскіліктерден 82-минутта Никола Крстович таразы басын теңдестірді. Келесі турда, 26 қарашада «Қайрат» өз алаңында швециялық «Мьёльбюді» қабылдайды.