«Болмайтын гол жіберіп алдық»: Тапалов – «Аталантамен» өткен тең ойын туралы

Алматылық «Қайраттың» қорғаушысы Еркін Тапалов ASnews.kz тілшісіне берген сұхбатында Конференция лигасы жалпы кезеңінің үшінші туры аясында италиялық «Аталантаға» қарсы өткен сырт алаңдағы кездесуді (1:1) қорытындылады.

– «Аталантаға» қарсы ойын қандай эмоция қалдырды?

– Эмоциялар, әрине, өте жақсы. Жеңіске жақын едік, бірақ болмайтын гол жіберіп алдық – қарсыластың позициялық шабуылынан емес, өзіміздің қателігімізден. Дегенмен, жалпы алғанда мұндай қарсыласпен өткен ойынның нәтижесіне қуаныштымыз, өйткені «Аталанта» – өте мықты қарсылас.

– Осы нәтижеге жетудің негізгі себебі қандай деп ойлайсыз?

– Бапкердің тапсырмасын өте жақсы орындадық деп ойлаймын. Жақсы қорғандық және қарсы шабуылдарға шығып отырдық – сондай қарсы шабуылдың бірінде голымызды соқтық. Гол жібергеннен кейін «Аталанта» допқа иелік етіп, бізге ойнау қиындай түсті, өкінішке орай, соңына дейін шыдай алмай, гол жіберіп алдық. Бірақ бұл нәтиже де біз үшін және еліміз үшін өте жақсы деп есептеймін.

– Италиядағы трибуналарда қазақстандық жанкүйерлердің қолдауы естілді ме?

– Бірінші таймда бой жазып жүргенімде біздің жанкүйерлердің дауысын анық естідім. Өте мықты қолдау болды, бұл үшін оларға үлкен алғыс айтамын.

– Команда Конференция лигасының қалған матчтарына қандай көңіл-күймен дайындалуда?

– Иә, чемпионат аяқталғаннан кейін эмоционалды тұрғыда ең жақсы күйде болмадық – чемпиондықты қолдан беріп алдық. Бізге жағымды эмоциялар алу үшін жақсы нәтиже керек еді. Қалған ойындарға басқаша көңіл-күймен шығамыз, үстіне дайындалуға да уақытымыз көбірек болады. Осы ойындарда жақсы нәтиже көрсетеміз деп сенеміз.

Айта кетейік, Конференция лигасы 2026/27 маусымының жалпы кезеңіндегі үшінші тур аясындағы «Аталанта» – «Қайрат» матчы 5 қарашада Бергамода өтіп, 1:1 есебімен аяқталды. Алматылықтар сапында 53-минутта Марк Гуаль мергендік танытса, бергамаскіліктерден 82-минутта Никола Крстович таразы басын теңдестірді. Келесі турда, 26 қарашада «Қайрат» өз алаңында швециялық «Мьёльбюді» қабылдайды.