«Жуырда бәрі шешіледі»: «Генк» сұрмергені Қазақстан құрамасы сапында қашан ойнайды

«Йонг Генк» клубының 17 жастағы шабуылшысы Шахмұрат Дәулетовтың әкесі Садыржан ASnews.kz тілшісіне берген сұхбатында қазақстандық футболшының ел намысын халықаралық деңгейде қашан қорғай алатынын айтып берді.

«Мен қазір Алматыдамын. Жақын күндері кері ұшуым керек, содан кейін екі аптаның ішінде құжаттарымызды ала аламыз. Алла бұйыртса, Шахмұраттың жасөспірімдер құрамасында ойнау мәселесі қараша айына таман шешіледі», – деп бөлісті Дәулетовтің әкесі.

Еске сала кетейік, Дәулетовтер отбасы қазіргі уақытта Бельгияда тұруға ықтиярхат алу үшін регуляризация үрдісін өтіп жатыр. Құжаттар толық реттелгеннен кейін «Генк» академиясының вингерінде Қазақстанның U-19 құрамасы сапында өнер көрсету мүмкіндігі пайда болады.

Айта кетейік, осыдан бірнеше апта бұрын Шахмұрат Дәулетов ҚПЛ клубтарының бірінен түскен ұсыныстан бас тартқан болатын. Футболшының басты мақсаты – Еуропада жүйелі түрде даму. Бұған дейін жас талант түркиялық «Антальяспор» мен бельгиялық «Беерсхот» құрамында ойнаған.

Қазақ футболшысы «РБ Лейпцигке» қарсы гол соғып, ассист жасады