«Ордабасы» менеджері – Гуцуляк туралы: ол «Андерлехт», «Удинезе», МЛС клубтарынан бас тартты

«Ордабасы» клубының медиа-менеджері және амбассадоры Бейбіт Әлібеков украиналық футболшы Алексей Гуцулякпен болған келіссөздерге тоқталды, деп хабарлайды ASnews.kz.

«Гуцуляк Transfermarkt порталында еркін агент атанған ең қымбат футболшылардың тізімінде төртінші орында тұр: бірінші орында Джейдон Санчо (10 миллион еуро), екінші орында Александр Зинченко (6 миллион), үшінші орында Кәрім Бензема (4 миллион), ал төртінші орында 500 мың еуроға арзандаған Алексей Гуцуляк (3 миллион). Біз осындай қымбат ойыншыны тегін алайын деп тұрмыз.

Айтпақшы, онымен бокс федерациясы арқылы байланысқа шықтық. Егер Гуцуляк ойнай алмай қалса, Жасұлан (Жасұлан Барменқұлов – клуб президенті) кінәлі болады, ал ойнап кетсе, біздің жеңісіміз деп білемін.

Гуцуляк біздің шақыртуымызды әзіл деп қабылдаған екен. «Жарайды, бос уақытымыз бар ғой, Қазақстанға барып көрейік» дегендей. Кейін онымен сөйлескенде: «Дарханға, Жасұланға қарадым, олар жақсы, алтын адамдар екен. Солармен бірге жұмыс жасағым келеді» деп айтты.

Украинада Алексейге қатысты хейт көп айтылады. Оған «Андерлехт», «Удинезе», МЛС және Жапония клубтарынан ұсыныс болғанымен, «Ордабасыны» таңдап отыр. Ол командада екінші рөлде емес, көшбасшы болғысы келеді. Украина құрамасында да жақсы ойнап, гол соғып жүр. Албанияға қарсы жалғыз әрі жеңісті голды соқты.

Украиналық футболшылар Қазақстанға мансабын аяқтау үшін келеді деген түсінік бар. Осыны өзгерту керек. Гуцуляк соңғы шешімді біздің стадионда, ойын кезінде қабылдады. Күн суық болса да, керемет мереке болып жатқанын көріп, таңқалды», – деді Әлібеков «Бірінші бол» арнасындағы подкастта.

Алексей Гуцуляк бұған дейін өз еліндегі «Карпаты Львов», «Десна», «Днепр-1» және «Полесье» клубтарында доп тепті. 28 жастағы вингер 2024 жылдан бері Украина құрамасында 16 матч өткізіп, 6 гол мен 3 нәтижелі пастың авторы атанды.