«Жан бағуға тура келеді»: «Бернли» бапкері Сәтпаевтың жарақатына қатысты мәлімдеме жасады

Англиялық «Бернлидің» бас бапкері Ники Хайен халықаралық матчтарға арналған үзіліс басталғанға дейін командаға қиын болатынын мойындады. Маманның пікірінше, клубқа қазіргі дағдарысқа төзе тұру қажет, деп хабарлайды ASnews.kz жергілікті Burnley Express басылымына сілтеме жасап.

«Кларетс» маусымды өте нашар бастады: Чемпионшиптің бес турынан кейін команда бірде-бір жеңіске жетпей, екі ұпаймен соңғы, 24-ші орында келеді. Лазареттегі ойыншылардың көптігі жағдайды одан сайын қиындатуда. Олардың қатарында жарақатына байланысты «Бристоль Ситиге» (1:2) қарсы соңғы ойынды өткізіп жіберген 18 жастағы қазақстандық шабуылшы Дастан Сәтпаев та бар.

Бапкер шолушы Мэтт Скрафтонға берген сұхбатында жанкүйерлердің шыдамы шегіне жеткенін мойындады, алайда кадрлық мәселелерге түсіністікпен қарауға шақырды:

«Мен командамның ертең емес, бүгін нәтиже бергенін қалар едім. Бірақ барлық жаңа ойыншылар мен жарақат алып қалғандарды ескерсек, бізге уақыт керек. Мен мұндай бастаманы күткен жоқпын және жанкүйерлерге өздері лайық нәтижені бере алмай жатқанымыз өкінішті. Барлығы 100 пайыздық бабына келуі үшін халықаралық үзіліске дейін біраз уақыт қажет. Оған дейін бізге тек жан бағуға тура келеді. Жеңістер де, жеңілістер де болуы мүмкін, бірақ қазір біз шынымен қиын жағдайдамыз».

Бұл Сәтпаев үшін нені білдіреді?

Хайен үлкен үміт артып отырған халықаралық үзіліс қыркүйектің соңында басталады. Дәл осы кезең Дастан Сәтпаев үшін шешуші болмақ. Еске сала кетейік, қазақстандық футболшы «Мидлсброға» қарсы матчта тамаша өнер көрсетіп, кездесудің үздік ойыншысы (MVP) атанған еді. Алайда ойынның аяқталуына тоғыз минут қалғанда тізе асты сіңірінен жарақат алып, бірнеше аптаға қатардан шығып қалған болатын.

«Бернли» алдағы турларда (ертең, 8 қыркүйекте команда «Рексеммен» ойнайды) «аман қалуға» тырысып жатқанда, қазақстандық жанкүйерлер үшін басты интрига – Сәтпаевтың қатарға қосылуы болып қала бермек. Шабуылшы Қазақстан құрамасының Ұлттар лигасындағы аса маңызды матчтарына (26 қыркүйекте Фарер аралдарына және 29 қыркүйекте Словакияға қарсы) бабына келіп үлгере ме – әзірге белгісіз. Дегенмен, ағылшын клубы қазан айындағы үзілістен кейін Дастан мен жарақат алған басқа да көшбасшылар алаңға жүз пайыздық дайындықпен оралады деп үміттеніп отыр.

«Варди Сәтпаевқа бәсекелес емес»: BBC тілшісі «Бернлидің» жұлдызды жаңа ойыншысы туралы

Сәтпаев Қазақстан құрамасының Ұлттар лигасы матчында өнер көрсете ме? Жарақатынан кейінгі жағдайы белгісіздік