Британдық БАҚ Сәтпаевтың жарақатына байланысты «Бернлидің» мүшкіл жағдайын атап өтті

Англия Чемпионшипі, бірінші және екінші лига матчтарын көрсететін танымал британдық The EFL Zone порталы (аудиториясы 100 мыңнан асады) «Бернлидің» қазіргі қиын жағдайына қатысты пікір білдірді, деп хабарлайды ASnews.kz.

Ресурстың сараптамалық шолуында Ники Хайен шәкірттерінің жағдайы тым нашар екені айтылған:

«Бернли» Чемпионшипте 24-ші орында келеді, ал олардың қазіргі уақыттағы ең үздік ойыншысы Дастан Сәтпаев бірнеше аптаға қатардан шығып қалды. Трансферлік науқан сәтсіз өтті, ал бас бапкер Ники Хайен үшін бұл өте нашар бастама».

Ланкашир клубы қазір үлкен дағдарысты бастан кешуде. «Мидлсброға» қарсы матчта сан бұлшықетін ауыртып алған қазақстандық шабуылшыдан бөлек, «Бернлидің» лазареті толып тұр: қазіргі уақытта командаға Лукас Пирес, Луи Бейер, Башир Хамфрис, Джош Каллен, Энок Ага, Джейдон Банель және Эшли Барнс жарақат салдарынан көмектесе алмайды.

Бес турдың қорытындысы бойынша «Бернлидің» еншісінде 2 ұпай бар және команда Чемпионшип турнир кестесінің соңғы сатысында келеді. Келесі матчын ұжым осы сейсенбіде, 8 қыркүйекте өткізеді.

Дастан Сәтпаев жарақат алды: қазақстандық футболшының қанша уақытқа қатардан шыққаны белгілі болды