«Челсидің» болашақ көшбасшысы»: сарапшы Сәтпаевтың «Бернлидегі» дамуына баға берді

Футбол подкастері әрі Twitch-тегі «Челси» туралы шоудың жүргізушісі Алекс Голдберг қазақстандық шабуылшы Дастан Сәтпаевтың «Бернлидегі» ойынына қатысты пікірімен бөлісті.

Чемпионшиптің төртінші турында «Мидлсброға» қарсы өткен кездесуде (1:1) 18 жастағы форвард негізгі құрамда алаңға шығып, 80 минут өнер көрсетті және кездесу қорытындысы бойынша матчтың үздік ойыншысы атанды. Британдық сарапшы жас қазақстандықтың осындай қиын чемпионатта физикалық тұрғыдан қарқынды дамуы ерекше назар аударуға лайық екенін атап өтті, деп хабарлайды ASnews.kz.

«Мен Сәтпаевқа қатысты уақытынан бұрын артық сөздер айтпауға тырысамын, бірақ ол мені күн өткен сайын таңғалдырып келеді. Ол бар-жоғы 18 жаста, Англияда енді ғана ойнай бастады, ал бүгін негізгі құрамда сол жақ вингердің позициясында шықты – шамамен бізде Морган Роджерс атқаратын рөлде ойнап, матчтың үздік футболшысы атанды. Әзірге ол туралы «Бернли» бапкері мен жанкүйерлері тарапынан тек жағымды пікірлер айтылуда. Маған жасөспірімнің Чемпионшиптегі мұндай жылдам жетістіктерін бағаламау дұрыс емес сияқты. Әрине, оған әлі де ұзақ жолдан өту керек. Бірақ мен болашақта «Челсидің» негізгі құрамында ойнайтын футболшының қалыптасып жатқанына кәміл сене бастадым», – деп жазды Голдберг.

18 жастағы қазақстандық форвард Дастан Сәтпаев «Бернли» сапында лондондық «Челсиден» жалға алу құқығымен өнер көрсетеді. «Мидлсброға» қарсы кездесу Сәтпаев үшін «Бернли» сапындағы төртінші және алғашқы минуттардан бастаған үшінші ойыны болды. Қазіргі уақытта қазақстандық шабуылшы нәтижелі әрекеттермен көзге түсе қойған жоқ. Чемпионшиптің төрт турынан кейін «Бернли» еншісіндегі екі ұпаймен жарыс кестесінде 23-орында келеді.

«Бернли» бапкері – Сәтпаев жайлы: Дастан 18 жаста болса да командаға көп энергия мен қарқын береді