«Бернли» бапкері – Сәтпаев жайлы: Дастан 18 жаста болса да командаға көп энергия мен қарқын береді

«Бернлидің» бас бапкері Ники Хайен «Мидлсбромен» болған матчтың үздік ойыншысы атанған Дастан Сәтпаев жайында пікір білдіріп, тең аяқталған кездесуді қорытындылады.

«Дастан командаға көп энергия мен қарқын береді. Мен үшін бұл өте маңызды. Мен ойыншының жасына қарамаймын. 35 жаста болсын, 18 жаста болсын – егер сен командаға энергия мен жоғары қарқын бере алсаң, әрдайым ойнайсың. Ең бастысы – осы.

Біз футболда көп нәрсе көрген тәжірибелі ойыншылардың жас футболшыларымызға бағыт-бағдар бергенін қалаймыз. Мен оларға доп тебуді үйреткім келмейді. Бірақ тәжірибелі ойыншылар жастарға матч қиын өтіп жатқан кезде қалай жеңіске жетуге болатынын үйретуі тиіс.

Сонымен бірге жастардың да тәжірибелі ойыншыларға үлгі бола алатыны керемет. Олар өздерінің энергиясы мен жоғары қарқынын командаға бере алады. Мен айтқан осы дүниелердің барлығын біріктіре алсақ, мықты команда құрамыз.

Екінші таймдағы ойынды көріп, осының бәрін ретке келтіре алатынымызға сенімдімін. Әрине, мен көп уақыт сұрай алмаймын, футболдың қалай жұмыс істейтінін жақсы түсінемін. Бірақ өздеріңіз де көріп отырсыздар: процесс жүріп жатыр, еңбегіміздің нәтижесі де байқала бастады», – деді Хайен.

«Бернли» Чемпионшиптің төртінші турында «Мидлсбромен» тең ойнады (1:1).

Дастан Сәтпаев негізгі құрамнан шығып, 80 минут ойнады және ресми түрде матчтың үздік ойыншысы атанды. Қазақстандық футболшы алаңдағы орнын босатқан кезде жанкүйерлер орнынан тұрып, қошемет көрсетті.

«Бернли» келесі кездесуін 5 қыркүйек күні 6-орында келе жатқан «Бристоль Ситиге» қарсы өткізеді.