ЧЛ-да қарсылас болды, ал енді командаластар: Сәтпаев «Бернлиде» «Селтиктің» экс-жартылай қорғаушысымен бірге ойнайды

Англиялық «Бернли» шотландиялық «Селтик» пен Жапония құрамасының жартылай қорғаушысы Рэо Хататэнің трансферін ресми түрде жариялады. 28 жастағы хавбек Чемпионшип клубымен үш жылдық келісімшартқа отырды, деп хабарлайды ASnews.kz.

Жапониялық жартылай қорғаушы мен 18 жастағы қазақстандық шабуылшы Дастан Сәтпаев бұған дейін де алаңда қарсылас ретінде кезіккен болатын. 2025/26 жылғы Чемпиондар лигасының іріктеу кезеңінде «Қайрат» сапындағы Сәтпаев «Селтиктің» намысын қорғаған Хататэге қарсы ойнаған еді. Енді қос футболшы Ники Хайеннің қол астында бірге өнер көрсетеді.

Келісімнің сомасы жарияланған жоқ. Шотландиялық гранд сапында жапониялық жартылай қорғаушы төрт жарым жыл өткізіп, 191 матчта 33 гол соқты. «Селтикпен» бірге ол бес чемпиондық титулды, сондай-ақ екі Шотландия Кубогы мен екі Шотландия лигасының Кубогын жеңіп алды.

«Бұл мен үшін өте сәтті қадам. Мен Англияда алғаш рет ойнайын деп жатырмын, бұл – мансабымды жалғастыру үшін керемет клуб», – деді Хататэ өз трансфері туралы.

Жапониялық жартылай қорғаушының келуі – трансферлік терезенің дедлайнында «Брайтоннан» келген қорғаушы Игор Жулио мен «Лидстен» ауысқан вингер Ларджи Рамазаниден кейінгі «Бернли» құрамының кезекті күшеюі болды.

2025 жылы алматылық «Қайрат» екі матчтың қорытындысы бойынша «Селтикті» сенсациялық түрде жеңіп (0:0, 0:0, пенальти бойынша 3:2), өз тарихында алғаш рет УЕФА Чемпиондар лигасының негізгі кезеңіне шықты. Осы текетіресте Дастан Сәтпаев Рео Хататэге қарсы алаңға шыққан болатын.

Қазіргі уақытта 18 жастағы қазақстандық форвард лондондық «Челсиге» тиесілі және «Бернли» сапында жалға алу құқығымен өнер көрсетеді. Чемпионшиптің үшінші турында «Норвичке» қарсы өткен кездесуде (1:4) Сәтпаев алғаш рет негізгі құрамда шығып, толық 90 минут бойы өнер көрсетті және Flashscore сараптамалық порталының нұсқасы бойынша 7.5 бағасымен өз командасындағы ең үздік ойыншы атанды. 28 жастағы Рео Хататэнің еншісінде Жапония ұлттық құрамасы сапында 11 матч бар.

«Бойында табиғи талант бар»: BBC сарапшысы Сәтпаевтың «Бернлидегі» болашағы мен бейімделуі туралы