Лионель Месси: Аргентина құрамасындағы 21 жыл – төрт жеңіліс, әлем чемпиондығы және қоштасу

2026 жылдың 31 тамызында кешке Лионель Месси Instagram парақшасында Аргентина ұлттық құрамасындағы мансабын аяқтағанын хабарлады. Ол бұл мәтінді 21 шілдеде – Әлем чемпионатының финалындағы жеңілістен екі күн өткен соң жазған еді.

Ал арада бір ай өтіп, әкесін жерлегеннен кейін ғана жариялады. ASnews.kz 43-секундтағы қызыл қағаздан «МетЛайфтағы» соңғы матчқа дейінгі 21 жылдық тарихи жолды еске алады.

Ол не деп жазды?

Месси бұл шешімді қабылдау өте қиынға соққанын мойындады: бұл қадам сол кезде де, қазір де жанына батқанымен, уақыттың келгенін түсінген. Ол құрама үшін әрдайым барын салғанын атап өтті – бұл тек команда бәрін жеңіп жүрген соңғы жылдарға емес, ештеңе ұта алмаған бұрынғы кезеңдерге де қатысты.

Буын алмасуы туралы негізгі ой пафоссыз айтылған: бойда күш қалмады, ал артында осы орынға лайықты өте дарынды жас футболшылар келе жатыр.

Сонымен қатар жазылған мәтін мен жарияланым арасындағы бір айлық паузаның себебін түсіндіретін соңғы жол бар: әкесінің қазасынан кейін ол бұл шешімнің қаншалықты дұрыс екеніне одан сайын көз жеткізген.

2005 жылғы 17 тамыз: 43 секунд және қызыл қағаз

Бәрі өте сәтсіз басталды.

Будапешттегі «Ференц Пушкаш» стадионында өткен Венгрия – Аргентина жолдастық матчы. 18 жастағы Месси 64-минутта Лисандро Лопестің орнына алаңға шығады. Арада 43 секунд өткенде неміс төрешісі Маркус Мерк оған тікелей қызыл қағаз көрсетеді.

Бұл эпизод әлі күнге дейін даулы: Месси өзін ұстап тұрған Вилмош Ванцактан сытылып шықпақ болғанда, одан босану үшін қолын сермеп, қарсыласына тиіп кетеді. Қайталаулар тиер-тимес жанасуды ғана көрсетеді.

Символдық деталь: Диего Марадона да ұлттық құрамадағы дебютін Венгрияға қарсы өткізген еді.

Аргентина 10 адам боп жүріп 2:1 есебімен жеңіске жетті. Месси бүкіл мансабында ұлттық құрамада тек екі рет қызыл қағаз алған – алғашқысы осы болса, екіншісі 2019 жылы Америка Кубогының 3-орны үшін Чилиге қарсы матчта Гари Медельмен қағысып қалып, екеуі бірдей алаңнан қуылған еді.

2006–2007: алғашқы үміттер

2006 жылы Германияда өткен әлем чемпионатында Месси Сербия мен Черногорияға қарсы ойында алаңға шығып, Аргентина тарихында мундиальда ойнаған ең жас футболшы атанды. Жарысқа дайындыққа сан бұлшықетінің жыртылуы кедергі келтірді.

Ал 2007 жылғы Америка Кубогын Месси құрамада ешқашан жарқырамаған дейтіндердің есіне салуға болады. Ол командадағы ең үздіктердің бірі болып, ширек финалда да, жартылай финалда да гол соқты, Хуан Роман Рикельмемен тамаша тандем құрып, Аргентина сенімді түрде финалға жетті.

Алайда финалда Бразилиядан жеңілді. Бұл ол жеңілетін төрт финалдың алғашқысы еді.

2008: 13 жылдағы жалғыз трофей

Бейжің Олимпиадасы. Алтын. Бұл – Мессидің кейінгі он үш жылда Аргентина сапында ұтып алған жалғыз жүлдесі еді, ол да болса ресми түрде басты турнир емес.

Ауыр онжылдық: үш жылда үш финал

Одан кейін оның еңсесін түсіре жаздаған кезең басталды.

• 2014 жыл, Бразилия: Әлем чемпионаты, финал, «Маракана». Аргентина – Германия. Қосымша уақытта 0:1, Марио Гетценің голы. Месси турнирдің «Алтын добын» алады, бірақ өзі қолын да тигізбеген кубоктың жанынан басын төмен салып өтіп кетеді.

• 2015 жыл, Чили: Америка Кубогының финалы жарыс қожайындарына қарсы. Пенальти сериясындағы жеңіліс.

• 2016 жыл, АҚШ: Ғасырлық Америка Кубогының финалы. Тағы да Чили. Тағы да пенальти сериясы. Месси соққыны қақпадан жоғары тебеді.

Үш жылда қатар келген үш финал – үш жеңіліс. Аргентина 1993 жылдан бері ірі трофей ұта алмаған еді.

2016: ол кетіп те үлгерді

Сол мүлт кетуден кейін киім ауыстыру бөлмесінде Месси құрамадағы мансабын аяқтайтынын хабарлады. Бұл әлеуметтік желідегі хабарлама емес, жеңілістен кейін бірнеше минут өткенде микст-аймақта сұхбат кезінде эмоционалды түрде айтылған сөз еді.

Аргентина жалпыұлттық қаралы күйге түсті. Елде «No te vayas, Leo» – «Кетпеші, Лео» деген ұранмен акциялар өтті. Президент Маурисио Макри футболшыға өзі телефон соқты.

Екі айдан кейін, 2016 жылдың тамызында Месси қайта оралды. Бапкер Эдгардо Баусамен Испанияда кездескеннен кейін ол өз шешімін қарапайым түсіндіріп мәлімдеме жасады: аргентиналық футболға тағы бір мәселе тудырғысы келмейді.

Сол кезде құрамадан Агуэро, Маскерано, Игуаин, Лавесси де кете бастады – бүтін бір буын бір мезетте қоштасып жатты. Ал Месси қалды.

2021: «Маракана» – бәрі өзгерген жер

Тағдырдың тәлкегі: 28 жылдық зарыға күткен жеңіс осыдан жеті жыл бұрын ең ауыр соққы тиген жерде орын алды.

2021 жылғы Америка Кубогының финалы, «Маракана», Аргентина – Бразилия. Жеңіс! Мессидің ересектер құрамасындағы алғашқы ірі трофейі. Аргентинаның 1993 жылдан бергі алғашқы титулы.

Оның көгалда әріптестерінің құшағында жатқан сәті бүкіл әлемді шарлап кетті.

2022: Финалиссима және Катар

2022 жылдың маусымы, «Уэмбли». Италияға қарсы Финалиссима – Еуропа мен Оңтүстік Америка чемпиондары арасындағы матч. 3:0. Екінші трофей.

2022 жылдың 18 желтоқсаны, «Лусаил». Францияға қарсы әлем чемпионатының финалы. Турнир тарихындағы ең ұлы матчтардың бірі: 3:3, пенальти бойынша жеңіс. Месси екі гол соғады.

Аргентина – 1986 жылдан бері алғаш рет әлем чемпионы. Месси 13 жыл бойы өзін «Марадона емессің» деген сөздерге себеп болған кубокты төбесіне көтереді.

2024: үшінші трофей

АҚШ-тағы Америка Кубогы. Аргентина тағы да жеңіске жетеді. Правда, финалда Месси тобық сіңірінің жарақатына байланысты алаңнан көз жасымен шығып, ойынды қосалқы құрамда аяқтайды.

Осы жарақаттың кесірінен ол ӘЧ-2026 іріктеу матчтарының бір бөлігін де өткізіп алды.

2026: соңғы би

Мансабындағы алтыншы әлем чемпионаты – бұл жетістікке Мессиден бөлек тек Криштиану Роналду ғана қол жеткізген.

16 маусым, Алжирге қарсы дебюттік матч (3:0). Месси хет-трик жасап, алғашқы голынан кейін туған алаңда көз жасына ерік береді.

Микст-аймақта ол бұны қысқа түсіндірді: себебі спортқа мүлде қатыссыз, өте ауыр күндерді бастан өткерген, жанында болып қолдау көрсеткен бүкіл делегация мен әріптестеріне алғысын білдірді.

Ол себебін айтпады. Екі күннен кейін Аргентинада оның әкесінің қайтыс болғаны туралы сыбыстар тарап, отбасы жеке мәселеге салғырт қарағандарға өкініш білдіріп, терріске шығару мәлімдемесін жасауға мәжбүр болды.

22 маусым Австрияға қарсы матч – дубль.

Жалпы турнирде: алты матчта 8 гол мен нәтижелі пас, алты кездесудің бесеуінде гол соқты. Килиан Мбаппемен бірдей гол соғып, ӘЧ-2026 үздік сұрмергені атағын бөлісті.

19 шілде, «МетЛайф», Нью-Джерси. Испанияға қарсы финал. Қосымша уақытта 0:1.

Месси алаңнан күміс медальмен кетеді. Оның мойнында күміс медальмен бос кеңістікке қарап тұрған фотосы жылдың ең басты суреттерінің біріне айналды.

8 тамыз: әкесі

Хорхе Месси 2026 жылдың 8 тамызында түнгі сағат 02:00-де Росариодағы «Сентро» санаторийінде қайтыс болды. Ол 68 жаста еді.

Ол ұзақ уақыт бойы ауырды. Оның денсаулығы туралы маусым айының ортасында – Лионель Алжирге гол соққаннан кейін көз жасын төккен күндері белгілі болған еді. Катар-2022 турнирінен айырмашылығы, Хорхе АҚШ-тағы әлем чемпионатына бара алмады.

Осыдан жиырма жылдан астам уақыт бұрын ұлымен бірге Барселонаға көшіп, футболдағы жолын бастауға себепкер болған дәл осы кісі еді. Титулдар да, рекордтар да, «Алтын доптар» да жоқ кезде ол бой өсу гормонымен емдеуді өз қалтасынан төлеген. Металлургия кәсіпорынында басшы болып істеп, ондаған жылдар бойы ұлының агенті ретінде ісін жүргізді.

Селия Куччиттинимен отбасын құрған, төрт баласы бар: Матиас, Родриго, Лионель және Мария Соль.

Месси Росариоға жабық қоштасу рәсіміне – қайтадан «Интер Майамиге» ұшып кеткенінен он күн өткен соң ғана оралды.

ЮНИСЕФ те көңіл айтты: Хорхе Лионель Месси атындағы қайырымдылық қорының жұмысына белсене қатысқан.

Дәл осы оқиғадан кейін 21 шілдеде жазылған мәтін жарыққа шықты.

Сандар

Месси Аргентина құрамасының барлық негізгі көрсеткіштері бойынша рекордымен мансабын аяқтайды: ұлттық құрама тарихындағы ең үздік сұрмерген, ең үздік ассистент және ең көп матч өткізген ойыншы.

Алты әлем чемпионатында – 21 гол және 8 нәтижелі пас, бұл оны турнир тарихындағы ең үздік бомбардир етеді.

Құрамамен ұтып алған трофейлері:

• Әлем чемпионы – 2022

• Америка Кубогы – 2021, 2024

• Финалиссима – 2022

• Олимпиада алтыны – 2008

• Жастар арасындағы әлем чемпионаты (U-20) – 2005

Жеңілген финалдары: Америка Кубогы-2007, Әлем чемпионаты-2014, Америка Кубогы-2015, Америка Кубогы-2016, Әлем чемпионаты-2026.

Бес жеңілген финал және бес ұтып алған трофей. Тепе-тең.

Одан кейін не болады

Аргентина футбол ассоциациясының президенті Клаудио Тапия бұған дейін Месси кеткеннен кейін құрамадағы 10-нөмір оған мәңгілікке бекітілетінін мәлімдеген – кезінде бұл нөмірде Марадона өнер көрсеткен еді. Оның айтуынша, бұл федерацияның жасай алатын ең аз құрметі.

Аргентиналық БАҚ қоштасу матчын ұйымдастыру жоспарлары туралы хабарлады – бұл әлеуметтік желідегі пост арқылы үнсіз кетудің орнына ауқымды оқиға болуы тиіс. Бұл матч енді өте ме, жоқ па, беймәлім.

Лионель Скалони Месси үшін құрама есігі әрдайым ашық екенін бірнеше рет қайталады.

Клубтық мансабы жалғасуда: «Интер Майамимен» келісімшарт 2028 жылғы маусымның соңына дейін жарамды. MLS-тің осы маусымында оның қоржынында 14 матчта 12 гол және 7 ассист бар.

Лионель Месси Аргентина құрамасында 21 жыл өткізді – 2005 жылғы 17 тамыздан 2026 жылғы 19 шілдеге дейін. Ол жасөспірімдер арасындағы әлем чемпионатын, Олимпиада алтыны, Америка Кубогын, Финалиссиманы және Әлем чемпионатын жеңіп алған тарихтағы жалғыз футболшы болып қала береді. Оның соңғы матчы ӘЧ-2026 финалдық ойынында Испанияға қарсы өтті.