Ақша бар, жеңіс жоқ: қазақстандық миллиардердің клубы Англияда сүрінді

Қазақстандық миллиардер Михаил Ломтадзеге тиесілі ағылшындық «Уиком Уондерерс» жаңа маусымда әлі жеңіс жолына түсе алмай келеді. Бірінші лиганың екінші турында команда өзінің «Адамс Парк» стадионында «Плимутпен» тең түсті – 1:1, деп хабарлайды ASnews.kz.

Бұл – ағылшындық ұжымның чемпионат басындағы қатарынан екінші тең ойыны. Екі турдың қорытындысы бойынша екі ұпай жинаған команда турнир кестесінің 16-жолына жайғасты.

«Уиком» келесі матчын 29 тамыз күні сырт алаңда «Стокпорт Каунтиге» қарсы өткізеді. Кездесу Қазақстан уақытымен сағат 19:00-де басталады.

Қазақстандық кәсіпкер әрі Kaspi.kz негізін қалаушылардың бірі Михаил Ломтадзе – «Уиком Уондерерстің» мажоритарлы иесі, оған клуб акцияларының 90%-ы тиесілі.

Команда Англияның маңыздылығы жағынан үшінші дивизионындағы жаңа маусымды қатарынан екі тең нәтижемен бастады.