Юрий Медведев – жарақаттан айығуы туралы: алдағы уақытта мықты чемпионатқа кетуге тырысамын

«Слован Братислава» клубының қорғаушысы Юрий Медведев ASnews.kz тілшісіне берген сұхбатында жарақатынан айыққанын хабарлап, алдағы жоспарларымен бөлісті.

– Юрий, жарақаттан айықтыңыз ба?

– Иә, жарақаттың салдарынан көп демалып қалдым – шамамен үш айдай. Қазір бәрі жақсы: бірте-бірте қалыпқа келіп жатырмын, енді қайтадан бабыма келуім қажет. Алдағы уақытта жарақат алмай, тұрақты түрде ойнауым керек. Дәл қазір басты мақсатым осы.

– Алдағы жоспарларыңыз бен мақсаттарыңыз қандай?

– Әрине, Еуропаның мықты чемпионаттарында бағымды сынап көргім келеді. Бірақ көп нәрсе өзімнің жағдайыма байланысты, өйткені соңғы жылдары жарақаттар мансабымды біршама бәсеңдетіп қойды. Жоғарыда айтқанымдай, алдағы уақытта бәрі реттеліп, мықты чемпионатқа кету үшін мүмкіндіктер пайда болады деп үміттенемін.

Юрий Медведев – «Слован Братислава» командасының 27 жастағы қорғаушысы, Қазақстан тумасы. Ол 2018 жылдан бері словакиялық клубтың намысын қорғап келеді, осы уақыт ішінде бірнеше дүркін ел чемпионы атанып, еурокубокта бақ сынады.