«Тобылдың» экс-футболшысы: Словакия чемпионы атанамын деген үмітім бар

«Тренчин» командасының жартылай қорғаушысы Шахмұрза Адырбеков ASnews.kz тілшісіне берген сұхбатында словакиялық клубтың дублінде емес, негізгі командасында ойнайтынын айтты.

«Бапкер Рикардо Мониз жас ойыншыларды жаңа деңгейге шығарумен танымал болған. Жаттығудан кейін ол футболшылармен жеке қалып, олардың осал тұстарын дамытуға көмектеседі. Бізбен жиі сөйлеседі. Сондықтан ол сияқты бапкерден көп нәрсені үйренуге болады деп ойлаймын. Мұнда келген себебім де сол», – деді 19 жастағы ойыншы.

Адырбеков жастар командасына ауысу туралы ақпаратты жоққа шығарды:

«Негізгі команда сапында жаттығып, ойнап жатырмын. Жақында «Железиарнеге» қарсы матчта (0:2) дебют жасадым. Әрине, біз қалаған нәтижеге қол жеткізе алмадық, бірақ мен алаңға шыққаныма қуаныштымын. Әрі қарай қарқын алып, «Тренчиннің» чемпион атануына көмектесемін деп үміттенемін», – деді бұрынғы «Тобыл» ойыншысы.

«Тренчин» Словакия чемпионатының сегізінші турында елдегі ең бай бес клубтың бірі «Железиарнеден» ұтылып қалды. Мониздің командасы осы ойыннан кейін алтыншы орынға түсіп қалды.

61 жастағы маман бұған дейін «Тоттенхэм», ПСВ, «Гамбург» және бес «Red Bull» құрылымында жұмыс істеген. »Тренчиннің» капитаны – «Манчестер Юнайтедтің» түлегі Шон Госс.