Балқаштағы футбол фестивалі 500-ден астам оқушының басын қосты

12 қыркүйекте Балқаш қаласындағы «Металлург» стадионында ALGA! жобасы аясында бұқаралық спорт фестивалі өтті. Іс-шара қала мектептерінің, сондай-ақ Ақтоғай және Шет аудандарының 3-4 сыныптарында оқитын 500-ден астам оқушының басын қосты, деп хабарлайды ASnews.kz.

Ұйымдастырушылар – Қарағанды облыстық футбол қауымдастығы (QOFA) мен өңірлік білім басқармасы. Жобаның басты мақсаты – бұқаралық спортты дамыту және футболды мектеп бағдарламасына іс жүзінде енгізу.

Стадион аумағында 20 жаттығу станциясы мен 12 белсенділік аймағы құрылды. Оқушылар 6–10 жастағы балаларға арналған УЕФА стандарттарына негізделген техникалық жаттығуларды орындап, сабсоккер, футбол дартсы және пенальти тебуден бақ сынады.

Ұйымдастырушылар фестивальдің қағидатты түрде жеңімпаздар мен жеңілгендерге бөлінбей өтетінін атап өтті.

«Былтыр фестиваль 400 баланы қамтыса, биыл – 500. Барлық тапсырма жас ерекшелігіне бейімделген. Егер іс-шарадан кейін бала үйіне келіп, ата-анасына футболмен айналысқысы келетінін айтса – бұл біз үшін басты жеңіс», – деп атап өтті QOFA әлеуметтік жобалар бөлімінің басшысы Данияр Қарибаев.

Жаңа оқу жылында ALGA! білім беру бағдарламасы географиясын кеңейтіп, Қарағанды облысының жаңа мектептерін қамтиды деп күтілуде.