159-дан жетеуі: «Шахтер» Академиясы жас таланттарды ауқымды іріктеудің қорытындысын шығарды

Қарағандыда «Шахтер» ФК Академиясына 2013 және 2014 жылы туған жас футболшыларды төрткүндік іріктеу аяқталды.

Бүкіл Қазақстаннан жиналған 159 үміткердің ішінен қатаң іріктеуден тек жеті бала өтті, деп хабарлайды ASnews.kz.

Тамыздың 17-сі мен 20-сы аралығында Академияның бапкерлер штабы мен басшылығы 2013 жылы туған 83 ойыншы мен 2014 жылы туған 76 ойыншының техникалық-тактикалық әрі физикалық дайындығын бағалады. Алғашқы күннен-ақ қатысушылардың басым бөлігі шығып қалды – келесі кезеңге әр жас санаты бойынша тек 20 футболшыдан ғана өтті.

Іріктеу қорытындысы бойынша қарағандылық клубтың құрылымына 2013 жылы туған үш ойыншы және 2014 жылы туған төрт ойыншы шақырту алды.

«Шахтер» ФК Академиясының балалар мен жасөспірімдер бағытын дамыту және селекция жұмыстары Freedom Holding Corp. акционері Тимур Турловтың қолдауымен жүзеге асырылады.

Мұндай іріктеулер Қазақстанның барлық өңірлерінен болашағы бар футболшыларды табу және дамыту үшін тұрақты негізде өткізіледі.