Қытайда туылған этникалық қазақ Польша клубымен келісімшартқа отырады

22 жастағы вингер Талпын Есдәулет Польшаның Слупск қаласындағы «Гриф» клубының сапына қосылады, деп хабарлайды ASnews.kz.

Футболшының жаңа командасы елдің төртінші дивизионында өнер көрсетеді. ҚХР-дың Іле-Қазақ автономиялық облысының тумасы Қытай академияларында шыңдалып, бұған дейін жергілікті Суперлигада «Наньтун Чжиюнь» намысын қорғаған. Сондай-ақ, ол сербиялық «Рад» және ИМТ ұжымдарында бағын сынап көрді. 2026 жылдың басында Есдәулет словакиялық «Йеднота Банова» клубының қаралымында болған еді, бірақ жұмыс визасын рәсімдеудегі кедергілерге байланысты ресми келісім жасалмады.

Қазіргі таңда Талпын Еуропалық Одақта жұмыс істеуге рұқсат алды. Бұл оған «Грифпен» еңбек шартын еш кедергісіз жасасуға мүмкіндік береді.

Бұған дейін ASnews.kz сайтына берген сұхбатында Есдәулет Қазақстан чемпионатында ойнағысы келетінін және ол үшін азаматтық алуға дайын екенін мәлімдеген болатын.

«Азаматтық алуға дайынмын»: Қытайда туылған қазақ футболшысы – Еуропадағы ойыны және Зуевпен достығы жайында