Қазақстандық футболшы Компанидің командасында гол соқты: оған жоғары лига клубтарынан қызығушылық бар

16 жастағы қазақстандық жартылай қорғаушы Аль-Фараби Мәделханов Бельгияның «BX Brussels» U19 командасында дебют жасады, деп хабарлайды ASnews.kz.

Қазақстандық футболшы алғаш рет Бельгияның 19 жасқа дейінгі чемпионатында алаңға шығып, «Моленбекке» қарсы ойында 75 минут өнер көрсетті. Негізгі позициясы жартылай қорғаушы болғанымен, бұл кездесуде ол шабуыл шебіне жақын ойнап, гол соқты. Осылайша командасының ірі есеппен жеңуіне (4:2) үлес қосты.

Матчты жоғары дивизиондағы екі клубтың өкілдері бақылаған екен. Соңғы 14 матчта Маделханов барлық турнирлерде 9 гол соқты.

Астана қаласының тумасы өткен жылы Бельгияға қоныс аударды. Бұған дейін ол елордалық «Динамо» мен «Оңтүстік» академиясында өнер көрсеткен. Сондай-ақ Түркияда да доп тепкен.

2013 жылдың наурыз айында «BX Brussels» клубын «Манчестер Сити» клубының бұрынғы қорғаушысы Венсан Компани өз иелігіне алды. Клубтың негізгі командасы аймақтық лигада өнер көрсетеді.