Қазақстандық футболшылар Еуропа клубтарына жеңіс сыйлады

«Генктің» жастар командасында өнер көрсететін шабуылшы Шахмұрат Дәулетов пен «Валенсия» академиясының жартылай қорғаушысы Ғабидолла Оразалы соңғы тур матчтарында нәтижелі ойын көрсетті, деп хабарлайды ASnews.kz.

Бельгиялық клубтың 16 жастағы вингері «Антверпен» U18 командасына қарсы кездесуде 90 минут ойнады. Матчтың негізгі уақыты аяқталар сәтте есеп тең болған еді. Алайда Дәулетовтың нәтижелі пасынан кейін команда капитаны Коби Ван Ден Брук жеңіс голын соғып, ойын 2:1 есебімен аяқталды.

18 тур қорытындысы бойынша «Генк» турнирлік кестеде көш бастап тұр. Команда «Стандард» пен «Андерлехт» секілді басты қарсыластарын артта қалдырып, осы маусымда небәрі бір рет қана жеңіліс тапқан.

Ал 14 жастағы Ғабидолла Оразалы «Валенсияның» жасөспірімдер командасында «Эльчені» 4:1 есебімен жеңуге өз үлесін қосты. Бұрын «Астана» жүйесінде ойнаған жартылай қорғаушы бұл маусымдағы 17-голын соқты. Испаниялық команда да өз чемпионатында бірінші орында келеді.

Бұған дейін қазақстандық ойыншы аймақтар арасындағы турнирде чемпион атанған еді. Финалда Валенсия қауымдастығының құрамасы Каталонияны 2:0 есебімен ұтты.