Қазақстан құрамасы экс-қақпашысының командасы Қытайда ұлттық турнирдің плей-офф кезеңіне шықты

Шыңжаң-Ұйғыр автономиялық ауданының жасөспірімдер құрамасы (U-18) Қытайдағы беделді турнирдің келесі кезеңіне жолдама алды. Командадағы қақпашыларды дайындауға Қазақстан ұлттық құрамасының бұрынғы қақпашысы Самат Отарбаев жауапты, деп хабарлайды ASnews.kz.

Футбол додасы футбол, баскетбол және волейбол жарыстарын біріктіретін «Үш үлкен доп» атты ауқымды жоба аясында өтіп жатыр. Бірінші кезеңнің іріктеу турнирі Бэйхай қаласында (Гуанси провинциясы) өтті.

Отарбаевтың командасы сегіз ұпай жинап, өз тобында үшінші орын алды. Бұл шыңжаңдықтарға «чемпиондық топқа» (екінші кезеңге) шығуға және келесі раундта рейтингі төмендеу командалармен ойнауға мүмкіндік берді.

Бэйхайдағы екі топтан шыққан үздік үштік Далянь немесе Куньмин қалаларына аттанады. Ол жақта олар басқа іріктеу аймақтарынан (соның ішінде Хайкоудан) келген мықты құрамалармен бақ сынайды. Егер Отарбаевтың шәкірттері бұл кедергіден де сүрінбей өтсе, оларды қыркүйек-қазан айларында Шэньчжэнь қаласында өтетін турнирдің финалдық кезеңі күтіп тұр.

Самат Отарбаев Шыңжаңдағы жұмысын 2025 жылдың наурыз айында бастаған еді. Дебюттік маусымында қазақстандық маман U-18 және U-20 командаларын Қытайдың Ұлттық ойындарына дайындап, екі ұжыммен де жетінші орынға табан тіреді.

Ойыншы мәнсабында ол «Ордабасы», «Қыран», «Ақтөбе» және «Тараз» клубтарының намысын қорғаған, сондай-ақ Қазақстан ұлттық құрамасына шақырту алған.