Қазақстан құрамасының бұрынғы қақпашысы Қытайдағы келісімшартын ұзартты

Қазақстандық маман Самат Отарбаев ҚХР Шыңжаң-Ұйғыр аутономиялық ауданының жасөспірімдер құрамалары жүйесіндегі жұмысын жалғастырады, деп хабарлайды ASnews.kz.

Бапкер алдыңғы келісім аяқталғаннан кейін жаңа шақырту алып, келісімшартын ұзартты және қазірдің өзінде U-18 командасымен оқу-жаттығу жиынында жүр.

«Қытайда футбол, баскетбол және волейбол жарыстарын қамтитын «Үш үлкен доп» деген жарыс бар. Қазір біз оған U-18 (2008-2009 жылғы) және U-16 (2010-2011 жылғы) санаттарындағы балалармен қатысып жатырмыз. Мен U-18 командасымен жұмыс істеймін. Қазір Гуанси өлкесінің Бэйхай қаласындамыз. Ойындар 2026 жылдың 7-17 наурыз аралығында өтеді. Егер бұл кезеңнен өтсек, жалғасы сәуір айында болады. Одан да сүрінбей өтсек, финал қыркүйек-қазан айларында өтеді. Төрт жылда бір рет өтетін және ең маңызды саналатын былтырғы Ұлттық ойындарға қарағанда, бұл жарыс жыл сайын ұйымдастырылады», – деді Отарбаев.

Еске салайық, Самат Отарбаев Шыңжаңға 2025 жылдың наурыз айында барған болатын. Өзінің дебюттік маусымында ол U-18 және U-20 командаларын Қытайдың Ұлттық ойындарына дайындап, екі ұжыммен де жетінші орын алды.

Ойыншы мансабында Отарбаев «Ордабасы», «Қыран», «Ақтөбе» және «Тараз» сапында өнер көрсетті, сондай-ақ Қазақстан ұлттық құрамасына шақырту алған.

Бұған дейін маман Қытайдың ең жабық өлкесіндегі жұмысы жайлы үлкен сұхбат берді.