Қазақстандық футболшы Ла Лига клубының резервтік командасында дебют жасады

17 жастағы қазақстандық шабуылшы Алдияр Нұрғали «Левантенің» резервтік командасы сапында алғашқы ойынын өткізді, деп хабарлайды ASnews.kz.

«Астана» мен «Қайраттың» экс-футболшысы Испанияның бесінші дивизионында «Родаға» қарсы өткен және 1:2 есебімен аяқталған матчқа қатысты. Қазақстандық ойыншы алаңда 25 минут өткізіп, осы уақыт ішінде екі қауіпті сәт тудырды:

«Мені үлкендер тобына ауыстыру баяғыдан жоспарланған болатын, бірақ команданың чемпиондық үшін таласып жатқанын ескерсек, бапкер жастармен тәжірибе жасауға дайын емес. Өкінішке қарай, қақпашы менің алыстан бағыттаған соққыларымның бірін қайтарып үлгерді», – деді Нұрғали.

Айта кетейік, 24 турдың қорытындысы бойынша «Левантенің» екінші командасы көшбасшы «Кастельоненседен» бар-жоғы төрт ұпайға қалып келеді.

Еске салайық, Қазақстан жасөспірімдер құрамасының вингері Алдияр Нұрғали Испанияға осыдан үш жыл бұрын ауысқан болатын. Соңғы айларда оның ойынын «Валенсия» мен «Вильярреал» сияқты клубтар бақылауда ұстап жүр.