Қазақстандық ойыншы Компанидің клубынан бір-ақ шықты: енді Бельгияда гол соғып жүр

Бельгиялық «BX Brussels» клубының 16 жастағы жартылай қорғаушысы Әл-Фараби Маделханов «Иксельдің» жасөспірімдер командасына қарсы жолдастық кездесуге қатысты, деп хабарлайды ASnews.kz.

Астана қаласының тумасы алаңға шабуылдаушы жартылай қорғаушы позициясында шықты. Ойынның екінші жартысында гол соғып, ол «BX Brussels» командасына жеңіс сыйлады – 3:2. Желтоқсан айында ел Кубогы аясында «Моленбекке» қарсы өткен матчта да (3:2) жас футболшы хет-трик авторы атанған болатын.

Маделханов – астаналық «Динамо» мен «Оңтүстік» академиясының бұрынғы ойыншысы. 12 жасында қазақстандық Түркияға қоныс аударып, онда «Генчлербирлиги» мен «Османгазиспор» сапында өнер көрсеткен.

Өткен жылдың ортасынан бері бойшаң әмбебап ойыншы Бельгияда жүр. Әуесқой «Косова Схарбек» сапында бір ай өткізген соң, ол Бельгия құрамасы мен «Манчестер Ситидің» бұрынғы капитаны Венсан Компани 13 жылдан бері иелік етіп келе жатқан «BX» клубымен келісімшартқа отырды.

Биылғы маусымда Маделханов ресми деңгейде тоғыз матч өткізді. Оның командасы өз конференциясында жетінші орында келеді.