Hearts Standard сарапшысы – Чесноковтың әлеуеті туралы: ол «Хартстың» ойынына сай келеді – бұған ешкімнің күмәні жоқ

Hearts Standard басылымының редакторы әрі BBC Scotland спикері Джоэл Скед ASnews.kz сайтына берген сұхбатында «Хартс» жанкүйерлерінің Ислам Чесноковтан не күтетінін айтты.

«Чесноков дербиде өзінің қайсар мінезін көрсетті. Алайда енді жанкүйерлер оның шабуылдағы мүмкіндіктерін көргісі келеді. Шотландияда оған сенім мол: ол бұл жақтың футболына өз еңбекқорлығы мен ойынға деген көзқарасының арқасында бейімделе алады», – деді Скед.

Қазақстандық вингер Шотландия чемпионатында «Хибернианға» қарсы матчта (1:0) алғаш рет «Хартс» сапында негізгі құрамда алаңға шықты. Ол ойынның аяқталуына 15 минут қалғанда алмастырылды.

Қазіргі таңда Эдинбург клубы турнир кестесінде көш бастап тұр. «Хартсты» бес ұпайға қалып қойған «Рейнджерс» өкшелеп келеді.