Нұрғали «Левантеге» қатарынан төртінші матчта жеңіс сыйлады: енді «Барселонаға» қарсы ойнауы мүмкін

Испанияның «Леванте» (U19) клубында доп тебетін 17 жастағы қазақстандық шабуылшы Алдияр Нұрғали «Патаконаға» қарсы матчта гол соқты, деп хабарлайды ASnews.kz.

Испания жастар чемпионатының 16-туры аясында «Леванте» өз алаңында «Патаконаны» қабылдады. Астана тумасы Алдияр Нұрғали матчты негізгі құрамда бастап, 20-минутта қарсылас қақпасын дәл көздеді. Кездесу 2:0 есебімен алаң иелерінің пайдасына аяқталды.

Осылайша, «Леванте» жастары қатарынан төртінші матчта жеңіске жетті. 18 қаңтар күні команда Испания Кубогы аясында каталондық «Дамм» клубымен кездеседі, ал ширек финалға жеткен жағдайда «Барселонамен» жолығуы мүмкін.

Бұл Нұрғалидың соңғы бір айдағы төртінші голы болды. Бұған дейін қазақстандық футболшы «Эльче» (2:1) және «Эркулес» (2:1) қақпаларына гол соққан еді.