Эксклюзив: Қазақстанға қарсы ойнаған Фарер аралдарының капитаны жиһаз сатушысы болып жұмыс істейді

Ұлттар лигасында Қазақстанға қарсы толық екі матч өткізген Фарер аралдары құрамасы мен «Клаксвик» клубының қорғаушысы Одмар Фере күнделікті өмірде жиһаз салонында сату маманы болып еңбек етеді, деп хабарлайды ASnews.kz.

Белгілі болғандай, 36 жастағы ардагер әрі фарерліктердің капитаны халықаралық аренадағы ойындарды қатардағы кеңсе жұмысымен сәтті бірге алып жүр. Фере бизнеске арналған жиһаз бен интерьер шешімдерін жеткізуге негізделген IDEmøblar – ILVA – Koppur & Kanna компаниясында сату маманы қызметін атқарады.

Бұған дейін фарерлік «Викингурдың» бұрынғы футболшысы Руни о Рейнатрёд ASnews.kz тілшісіне берген сұхбатында футболды қарапайым жұмыспен қатар алып жүрген ұлттық құрама ойыншылары туралы айтып берген еді. Ол мысал ретінде электрик болып жұмыс істейтін оң қанат қорғаушысы Йоаннес Даниэльсенді және жиһаз сататын Одмар Ферені атап өткен болатын.

Ұлттар лигасының биылғы маусымында 36 жастағы Фере Қазақстан құрамасына қарсы екі ойында да бастан-аяқ (180 минут) алаңда болды. Торсхавндағы алғашқы матч 1:1 есебімен аяқталса, Астанадағы екінші ойында да 2:2 есебімен тең нәтиже тіркелді.

«Кейде балағат сөз де керек»: ҚПЛ чемпионы Ван ’т Схип пен Қазақстанның Ұлттар лигасындағы сәтсіздігі туралы