«Ұтылмағанымызға шүкір»: Қазақстан құрамасының көшбасшысы – Фарермен тең ойын туралы

Қазақстан құрамасының қорғаушысы Сергей Малый ASnews.kz тілшісіне берген сұхбатында Ұлттар лигасы аясындағы Фарер аралдарына қарсы матчтағы тең нәтижеге (2:2) қатысты пікір білдірді.

«Шынымды айтсам, командаға үнемі өте ауыр қысым түседі. Сол себепті біз еркін ойнай алмаймыз. Екінші голды өткізіп алғанда жоғалтатын ештеңе жоқ екенін түсініп, бірдеңе істеу керек болды. Құдайға шүкір, ұтылмадық, бірақ, әрине, бірінші минуттан-ақ жеңіске жеткіміз келген.

Бұл қысым ең жақсы ойынымызды көрсетуге кедергі жасайды. Барлығына нәтиже керек, әрбір жаңа бапкер келген сайын барлығы тек нәтижеге негізделетінін түсінеміз. Өкінішке қарай, мұндай ойын нәтиже әкелмей отыр. Нені өзгерту керек? Жай ғана ойынды жүйелеп, қорғаныстан шығуды үйреніп, байланыстарды кезең-кезеңімен қалыптастыру қажет, сондай-ақ ойынды өз қолымызға алудан қорықпау керек. Қазір керісінше, әркім қателеспеу үшін ойын тізгінін алудан бас тартады, өйткені әрбір бастама – үлкен тәуекел. Ешкім жауапкершілікті өз мойнына алмас үшін тәуекелге барғысы келмейді», – деді Малый.

УЕФА Ұлттар лигасының төртінші турында Қазақстан құрамасы «Астана Аренада» Фарер аралдарымен тең түсті (2:2). Ойын барысында алаң иелері екі доп айырмасымен ұтылып жатып, Сергей Малый (68-минут) мен Нұралы Әліптің (76-минут) голдарының арқасында таразы басын теңестіре алды. Қос ұжым да матчты он адаммен аяқтады: 68-минутта Мартин Агнарссон алаңнан қуылса, 85-минутта Малыйдың өзі қызыл қағаз алды.

Айта кетерлігі, бұл ойын Сергей Малый үшін ұлттық команда жейдесіндегі 77-матч болды. Осы көрсеткіш бойынша ол Самат Смақовты (76 матч) басып озып, Қазақстан құрамасының жаңа рекордын орнатты. Джон ван ’т Схип шәкірттері келесі матчын 13 қарашада сырт алаңда Молдоваға қарсы өткізеді.