Матч орталығы
ҚПЛ-дың африкалық шабуылшысы: Бонифейстің «Ордабасыға» ауысуы – мансабындағы кері қадам
21 қараша, 10:59

Фото: Нсунгуси Эффионг және Виктор Бонифейс
«Атыраудың» бұрынғы шабуылшысы Нсунгуси Эффионг ASnews.kz сайтына берген сұхбатында Виктор Бонифейстің «Байер» клубынан «Ордабасыға» ауысу мүмкіндігіне қатысты пікір білдірді.
«Бонифейс «Ордабасыға» ауысады деп ойламаймын. Бұл оның мансабындағы кері қадам болар еді. Оның үстіне, Қазақстандағы алаңдардың жағдайы оның тізесіне ауыр соққы болуы мүмкін», – деді нигериялық футболшы.
БАҚ өкілдерінің мәліметінше, «Ордабасы» «Байердің» 25 жастағы шабуылшысы Виктор Бонифейсті қатарына қосуға ниетті. Нигерия құрамасының ойыншысы команданың жаңа бас бапкері Карел Герартстен шақырту алған. Герартстың жетекшілігімен ол бұған дейін Бельгияның «Юнион Сент-Жиллуаз» клубында өнер көрсеткен.
Ағымдағы маусымда африкалық шабуылшы Германия Бундеслигасында небәрі екі ойынға қатысты. Оның тізесіне қатысты созылмалы мәселелері бар. Атап айтқанда, мансабында айқас байламдары екі рет үзілген.
Әлишер Аманжол