«Ойынын болжау қиын, керемет ойыншы»: Владимир Вайсс Кенжебектің ойынын бағалады

Словакия құрамасының бас бапкері Владимир Вайсс матч алдындағы баспасөз мәслихатында Қазақстан құрамасының вингері Ғалымжан Кенжебек туралы пікірімен бөлісті, деп хабарлайды ASnews.kz.

Маман қазақстандық ойыншының қабілетін жоғары бағалап, оның Ұлттар лигасының алдағы матчы өтетін қаланың жергілікті клубындағы ойындарын еске алды.

«Мен оның бойынан үлкен әлеуетті көрдім, ол – жақсы футболшы. Ол осында, «Кошицеде» тамаша өнер көрсетіп, «Слованға» гол соқты. Ол позитивті әрі ойынын болжап білу қиын футболшы. Ғалымжан доппен өте епті қимылдайды: бағытын кілт өзгертіп, бір қапталдан екінші қапталға ауыса алады. Өте жақсы ойыншы», – деп атап өтті Вайсс.

Еске сала кетейік, Қазақстан құрамасының вингері Ғалымжан Кенжебек 2025 жылы Словакия чемпионатында жергілікті «Кошице» сапында өнер көрсеткен болатын. Словакиялық клуб құрамында ол 10 матч өткізіп, бір гол соқты және бір нәтижелі пас берді. Ал сол жылдың жазында ол семейлік «Елімайға» ауысты.

Словакия және Қазақстан құрамалары арасындағы Ұлттар лигасының екінші тур матчы 29 қыркүйекте дәл осы «Кошице футбол аренасында» өтеді. Бастапқы ысқырық Астана уақытымен 23:45-те естіледі.